لا تسأليني كيف نبرات الاحساس= حطي على قلبك يدك واسأليني
لا صار في قلبك مثل حد الأمواس = هاذيك نبراته ولا تنشديني
أنا أعرف إن العرق للعشق دساس= وأنا أدري إنك يا الغلا تذكريني
على الوعد باذني يدقن الأجراس = ولأجل اللقاء باقطع عجاج السنيني
لو يختلف وعدك ترى الوضع ينحاس = وأبقى احسب ليه ومتى تجيني؟
لا تخلفين الوعد والناس للناس = وأرجوك بعد اليوم لا تتركيني
لو تنفثين بوجهتي عطر الأنفاس = كل الجهات تفوح عطر ٍ ثميني
لا عطر باريسي ولا عطر تكساس = تشبه نفسِّك اللي يبرد حنيني
حتى الثرى اللي تحت رجليك ينداس = يصبح لبورصات الجواهر وزيني
مع وقع خطواتك يميلن الأغراس = ومن ورد وجناتك حياها يبيني
وإذا لفيتيني أقول ألف لا باس =وعلى منابر شوقك استقبليني
لاجل الشعر حطيت مرسم وكراس = أحيي بها ماض الغرام الدفيني
شعر ٍ كتبته في معاليك نبراس =حبره من أغلى عرق عرق الوتيني
تطوين قلبي بالهوى طي قرطاس = وبيديك نفحات الغلا تحتويني
ترى الفراق يثير وحشه وهوجاس = أرجوك من لقياك لا تحرميني
لا صار نبض القلب باليد ينقاس = فهاذيك نبرات الوله والأنيني
هذا الجواب وجاك علمي من الراس = وإن كان دون المستوى فاعذريني