اخواني الاعزاء احببت ان تكون المصافحه الاولى

الشعر مثل السيف مرهـف وبتـار=يدرك به الشاعر هـواه ومرامـه
الشعر منظومة احاسيـس وأفكـار=فن وبلاغـه والمعانـي وسامـه
وش خانة الشاعر ليا صار هـذار=ماينتفع من يستمـع فـي كلامـه
يا كثر ما في وقتنا اليـوم شعـار=كل(ن) لجل قصده يجـرد حسامـه
اللي كتب في وصف ريمي الأقفـار=واللي كتب فالمدح وأهل الزعامـه
وأنا صخرت القاف في خير من سار=أزكى صـلاة الله عليـه وسلامـه
على البسيطة ما وطت رجل ديـار=من خلقـة الدنيـا ليـوم القيامـه
أطهر من أقدام النبي خير الأخيـار=شفيعنا بالحشـر وقـت إزدحامـه
أشرف نسب من جملة الخلق مختار=إختاره الرحمـن وأعلـى مقامـه
وأنزل عليه الوحي بالديـن فالغـار=في وقت كان الكون حالك ظلامـه
الجهل ويا الشرك في كل الأقطـار=غمامة يـا كبرهـا مـن غمامـه
وبدل ظلام الجهل والشرك بأنـوار=أنوار توحيـد وهـدى واستقامـه
بدر(ن) غشا طيبه وحيوه الأنصـار=ولفتح مكـة كـان جـل اهتمامـه
الرحمة المهـداة لصغـار وكبـار=اختصـه الله للرسـل بالامـامـه
من رحمته قال اذهبوا وأنتم أحـرار=ما عاقب اللـي حاربـه بانتقامـه
بلغ رسالة ربه بصـدق وإصـرار=العدل نهجـه والشريعـة نظامـه
هذا هو المبعـوث تبشيـر وإنـذار=لأهل العقـول الواعيـة والفهامـه
واليوم تقدح فيه مجموعة أشـرار=حثالـة أشـرار بلـيـا كـرامـه
يا أمة المليون قصدي يـا مليـار=هبوا على شانه بعـزم وصرامـه
و شلون مانهتـز ونثـور ونغـار=للـي بلـغ بالمجـد ذروة سنامـه
يا خير خلـق الله تفـداك الأعمـار=ويفداك مابالكون شرقـه وشامـه
وختامها تكـرار ومـرار ومـرار=أزكى صـلاة الله عليـك وسلامـه

عبد العزيز الذويبي

[TABLE1="width:95%;"]