انت دايم منزلك معتلي فوق النجوم = فوق حسادك وصعبه عليهم يوصلوك
لانخيتك ياقصيدي تنومس فاللزوم = جيتني صامل وشامخ ولك هيبة ملوك
ماتقلل قيمتك لو تجي بعض العلوم = ومايقلل هيبتك قول من هم ينقدوك
والله اني من غلاك افتخر بك كل يوم = الجزاله امك وقمة الابداع ابوك
راس مالي فالمواقيف تفداك الرخوم = لاجل هم مايعرفونك ترى ماثمنوك
قوم وارقا في سما المجد والابـداع حـوم = خلهم لين اخـر العمـر تبقـى مانسـوك
يشهد الله ماكسبتك بعد حب الخشوم = من بنات افكاري اكتبك مافيها شكوك
صرت في يمناي خاتم وتحت الامر دوم = يعني مطلع عليك انت واملاكي صكوك
وعند غيري صرت سلعه ومن يبغى يسوم = بالدراهم والريالات دايم يشتروك
ليه مافخر وارفع الراس بك عند القروم = اللي يقولون يسلم لساني لاقروك