شعار وقتن فات غنوا بالاطلال = كلن يهوز الفارقة والمهيله
انا اشهد ان الحب يا ناس قتال = هم الدجيما راح به من خليله
ومسلّم اللي ذب عمره من الجال = افراق مضنونه ضعف فيه حيله
غنواْ مثايلهم بزينات الامثال = در البحر من نقوته يا عميله
وسفيرنا جاير عليهم بما قال =(غلطوا ولا عرفوا لحب الفضيله)
لا والله الا الحب سِلٍ وسلال = ينهش ضلوع اللي لفاه يعني له
لمنّ بوسط الروح حط اله منزال = شوق الفواد اللي رموشه ظليله
عنق الغزال اليا تذير مع اللال = وعيون حرن لا كفخ في سبيله
مشيه بهونه لا تسرّع ولا اعجال = ولا مرّته ذعذاع نودٍ تميله
لا اقبل مثل غيثٍ همى وواديٍ سال= وليا تقافا مثل خيلٍ اصيله
يا عنوة اللي عن مقابله رحّال = ويا طيب من راعاه واصبح حصيله
عز الله انه يهتني به ليا طال = يروى ضماه بعذبه وسلسبيله
على النقا ماهو تدرّاق وهبال = طهر الدروب وطيب قلبٍ يشيله
والله يجملنا على كل منوال = يا ذخر تلعات البيوت الجزيله
يا شاعرٍ ما ينطح القيل والقال= عنتيت والعنتيت من يرتكي له
ماهوب عيٍ بكفخه كل عيّال = ما يتبع الا من يكثّر قليله
تومي به فعوله على راس الاقذال = رداه من صدره طفح في شليله
عسَى مثليه فدوة لطيّب الفال = وعسى حياته بين طيحة وميله
ودورة زمنّا غيرت كل الاحوال = يالله تاقانا الخطا والرذيله
لا خير فيمن ينتهج خلف جهّال = لن ضاق ما حصّل حدٍ يشتكي له
والمال ما يصنع رياجيل وابطال = لكن زمنّا حقق المستحيله
والوقت مدهال الغباين والاهوال = ما ينتسلّم ل إغدره واتحويله
وغناتنا ماهيب بجنيه وريال = وليا ملكناها همومٍ ثقيله
غناتنا بنفوس قنعا ولو مال = فيها زمنّا ما تعوّد ذليله
وايامنا تسري الى حين الاجال = وخيارنا من حط دينه دليله