|
عتيبة الهيلا الزحول المعاطيب
قصيدة في القبيلة العزيزة عتيبه
وقد شدني لكتابتها الاخ الشاعر فواز العتيبي ريف النشامى
يامرحبا بجزل المعاني تراحيب =ريف النشامى اللي تراحيبه كثار كريم مجبولٍ على العز والطيب =كفه تهلي كل ماجاوا خطار شروى العتيبي مرتب القاف ترتيب = من لابةٍ حطت للامجاد تذكار عتيبه الهيلا الزحول المعاطيب =سلاطين وثقال ورفيعين وكبار خاويتهم وياعنك مابه عذاريب = عذروبهم لاصحابهم ظل وستار اخوان وربع وطيب رفقه واصاحيب = خويهم مايلحقه ظيم واكدار يدرون حسّة خاطره من الهباهيب = يفدى معرفتهم قصيرين الاشبار خوة وفى تغتاض منها الاجانيب = لها على سلم العرب شيمه وكار من الدواسر لابتي والمناسيب = وكني من عتيبه معزه ومقدار ارفعلهم في كل عالي مراقيب = من البياض ابيات واذكار واشعار |
الغالي الشاعر عبدالله بن عريمه الله انه يسعدك بجميع اوقاتك بكل خير واسعدني ان اكون اول المصافحين لهذه القصيده الاجزل من جزله والاروع من رائعه ويستاهل الممدوح فواز العتيبي وقبيلته وصح لسانك وعلا شانك مليون ولايكفون وتقبل تحياتي |
..
انا افداك يا عبدالله و صح لسانك يالجزل تخونني عبارات الشكر على هذه القصيده الرائعة اللتي سوف تكون في مكتبة الخاصة فشكرا لك على اخلاقك السامية و الرفيعة و ما انا الا رجل من عتيبة و لا هانوا كل القبايل و النعم فيك و في قبيلة الدواسر افتخر بمعرفتي بك و بشرواك من ابناء عمومتك لا هنت و لا هان راسك يالقرم و انا بالخدمة دائماً و لا يردك غير لسانك يا عبد الله موفق و ما اقول غير الله يرفع قدرك وهذا ردي جيت اكتب الجزله ولا لي مطاليب=و اسوق من حلواتها بيض الافكار للي سبق مدحه رجالٍ مناجيب=ابن العريمة مكرم الضيف و الجار يمدح عتيبه صلف روس المشاهيب=يا عل من يشناه تناساه الاحرار وانا عتيبي ماقفي ماقف الذيب=واسد عن ربعي و لاني بنكار واذكر هل الشيمه وانا اعد و اجيب=لي في بداة الوقت صحبه و تذكار بيت الدواسر يا الرجال المناعيب=عز الدخيل و عز من جاه محتار تبقى المهاند في يديكم ملاهيب=والا السنا في سالف الوقت دمار واليا لفيت البيت تلقى المواجيب=منها الدلال الصفر و البن والنار و منهم عريب الجد شاعر و لا ريب=ولد السدارى حامي البيت و الدار يا جعل رحمة خالقي قبره اتصيب=و ختامها صلوا على خير مختار كل التقدير ريف .. |
الشاعر ابن عريمه
عتيبه تستاهل وانت كفو والشاعر فواز العتيبي ريف النشاما يستاهل وانت تستاهل رده عليك فالف صح لسانك وعلا شانك لاهنت |
والله ونعم بالجميع
وصح لسانك ياعبدالله ويستاهل اخونا القدير ريف النشاما وهو الريف بالفعل اجمل تحية وود وتقدير م القلب |
صح السانك اخوي عبدالله بن عريمه وصح السان اخوي فواز عتيبه تستاهل وانت كفوووو ولاهيب غريبه منك لانك من موكر احرار كل الود والتقدير لشاعرنا القدير |
اقتباس:
الاخ الغالي سفير المعاني صح بدنك وشرفني حضورك وكلامك الجزل الله يعطيك العافيه لك كل الشكر والتقدير |
ياهلا بخوي فواز العتيبي ريف النشامى الحقيقه انت تباركت عليّ اكتب في عتيبه بعض من وفاهم وقصيدتي في عتيبه من بركاتك على انهم يستاهلون اكثر واللي قلته مايوفي اللي في خاطري وكنت ناوي من اول اكتب قصيده في عتيبه وبعدما قريت قصيدتك جاريتها بما اكنه لعتيبه من معزه وتقديروحب ومالي طيب فهم معارفي واعتبر نفسي مقصر ويستاهلون عتيبه العلم الغانم بفعل ايمانهم وانا تشرفت بخوة عتيبه ولقيت الفخر في خوتهم لصفاتهم الكريمه وعلو انفسهم وصح لسانك واعتلاشانك ويعلم الله ماقلتها ابي رد |
الحق ماغطه عريب المناسيب
ونفسي لها في خوة العز معبار شاعر ولي مبدا وعرف ومواجيب وهذي لها شيمه وقيمه ومقدار رفعة معرفتنا سنام المطاليب وعتيبه الهيلا لها الطيب يندار |
اقتباس:
وشرفني حضورك وثنائك وصح بدنك ورفع الله قدرك كل الشكر والتقدير لجنابك |
| الساعة الآن 10:45PM |
Powered by vBulletin® Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية