شبكة رهب الأدبية-ريما محمد السديري - (( نجــم السويبـع )) للشاعر : محـمد بن سمير

(( نجــم السويبـع )) < إستغاثــه

للـشاعــر المبـدع : مـحــمد بن سميـر الحـزيمـي العتيبـي

نجم السويبع شيـف والوسـم قـربّ**والقـاع ممحـل يابسـات ٍ طبوقـه
يارب مـن رحمتـك نطلبـك مطلّـبّ **طال الزمـن والنبـت قلـت أوفوقـه

تامر بمـزن ٍ مدلهـم ٍ مـن الغـربّ**ليا أقبل من المنشى حقوقـه صدوقـه
بالخير والرحمـه وفضلـك موهـبّ **ترعد رعـوده مـع تلاعـج بروقـه

وليا إحتمل حمله من المـاء ونصـبّ**يطقـه الشرقـي وحملـه يسـوقـه
ويصب ماه ليا تعـدى حضـن صـبّ **غيث ٍ ثجـاج بـدون شـيء يعوقـه

يمطر وينصـاء نجـد بهدايـة الـربّ **كن الجبـال السـود فيـه مخلوقـه
وكـن القنابـل فيـه والنـار تشتـبّ **وبرقه من أقصى ضلم يكشف خنوقـه

والناس من لونـه تخـاف وتغـاربّ **غريب مـن مابـه وعـذب ٍ بذوقـه
وسحم الذيابه مـن رعـوده تقانـبّ**وباق النفوس تقـول منـه مخنوقـه

ليا أوحيت وبله قلت صلف الهوى هبّ **والأرض من وبلـه تقـول معزوقـه
يمسح عقوم اللي يسكر بهـا الـدربّ **ويظلم بجو الكـون والشمـس فوقـه

والضلع يشرب وجلد القـاع يشـربّ**وسيله مع الـوادي وسـاع ٍ فتوقـه
وطرايـح الـوادي بسيـلـه تقـلـبّ **ومثل الخيام البيـض غثـو ٍ يحوقـه

ونبت ٍ )شواه القيض والوقت الأشهـبّ **يسقيه مـن وبلـه ويحيـي عروقـه
وتصبح فيافي نجـد روض ٍ معشـبّ **ليا مرهـا العسـاس نبتـه يشوقـه

كن الوطـى مكسـي بـزل ٍ مهـدبّ *جنه لـراع النـوق بأطـراف نوقـه
وبعض الزواحف فالزماليـق تنشـبّ **ويلعـب القمـري ويكثـر خفـوقـه

وريحه علاج اللي تعثـر بـه الطـب ** ّوتدله أنفوس أهل النفـوس الحموقـه
وراعي سهاف القود يدلـه ويطـربّ **وريح الخزامى والطعم فـي غبوقـه

وعقبه تساقيه السحايب علـى غـبّ **من وادي الخرمه ليا أطـراف لوقـه
لين العلف فالسوق مـا عـاد يجلـبّ *يعفن ورى الكبرات ما طـب سوقـه

وش ذنـب مخلـوق ٍ بليـا مـرتـبّ **مسلـم ومؤمـن والليالـي صفوقـه
يتبع حلالـه فـي رجـا الله ويتعـبّ **ومـن القسـاوه ناشفـات ٍ إشدوقـه

وش ذنب حيوان ٍ مغر جلـد وأجـربّ *ومـن العجـاج منفجـات ٍ إرموقـه
الناس تذنـب ماترفـع عـن الذنـبّ *ومن الحسد كـن الحـزوم محروقـه

كـل ٍ بلوحـه ذنـب ماينتحـسـب ّلكـن بالرحمـه عبـادك شفـوقـه
مافيه شيـن عنـدك يـارب يصعـبّ **الخالـق أنتـه والنفـوس مخلوقـه

يالخالـق الفالـق ويافـارج الكـربّ**يامولج ٍ ليـل الدجـا فـي شروقـه
يامسيـر دم الشرايـيـن فالقـلـبّ **فأضيـق عروقـه مستمـر ٍ دفوقـه

يا الواحد الفرد الصمد منبـت الحـب **ّيارازق ٍ حوت البحـر فـي عموقـه
تجعل ملـك يمنـاي بالخيـر يكتـب ّ**وتجعل ملك يسـراي عنـه مغلوقـه