ميت من البرد يا شمس الدفى وينك=نظره من العين يا شمسي تدفيني
ضمي كفوفي وخبيها بكفينك=خلي وصالك بقدر البعد يحييني
قلبي كما الطفل ان غبتي بكى فينك=وان طال هجرك علينا قال وديني
يا ما جرى يرتمي باحضان جنبينك=يا ما همس لك يوشوش لك ويشكيني
كم كان يسهر يقــلّب في دواوينك=كم كان يمسك قلم لجلك ويهجيني
ينسى وجودي وهايم في عناوينك=وان ضعت ما همّه انه ما يلاقيني
ان كان ساكت يداعب لون خدينك=وان كان ناعس هذى بسمك ويشجيني
الورد ما ينغرس الا على طينك=والعطر من غير انفاسك يجافيني
الزين كله ولا هو شي في زينك=في ذمتي لو يشوفك قال يا شيني
والسحر لو شاف عينك طاح في عينك=واعطاكي اسمه وقلك غير سميني
روج الشفايف معلّم في فناجينك=والريق طعمه اذوقه في شراييني
وين الوطن والوطن هو داخلك بينك=وغربة الروح اخر ما بقي فيني
اكبر عذاب يوم تحطيني بنصينك=كان ارحم انك من اوّلها وتنفيني
ودّي بذكرى على اكبر ميادينك=ويكون تذكار تحته قبر يكفيني
يا شمس عمري عسى الاوتار هزينك=عسى حنيني على شطك يرسيني
ميت من البرد وانا في براكينك=اذوب من حرّها والبرد ماليني