يا صديقٍ لا بدت له حاجةٍ ينصاني =ولو تكرر مطلبه مني فانا ما مله
يجتلد من حرته لا شال هم وجاني = ويشكر المعروف مني لا لفى في حله
العرب يقلون لا جاء شاكي الحرمان ِ =يلهي المحتاج عن شأنه شراب الدله
لو صديقي ما تعب من شأن يقضي شاني = رغم هذا بستمر اقدره وأجله
الذهب سعره يرجح كفة الميزاني = ما ترخصْ قيمته لو كان وزنه قله
الزمان اللي على درب الردى يحداني = صرت مثل اللي شرى له من حلاله عله
والضعيف اللي يحاول رميتي واخطاني = لا تحمل زلته واتجاوزه وأزله
وادري إني كفو والطم خصمي وعدواني = لكن اخشى اخذ كريم بزلته واذله
التسامح مصدري في منهجه عنواني = لا تعرض سيفك لهفوة دني وتسله
واعرف اميَّز كلامي لا نطقه لساني= وان نطق غيري كلام اميَّزه وادله
وش يميز صاحب الحكمه من الخبلاني = غير عقلٍ ما يجيب الكلمه المنحله
إحترامي للبشر قحطاني وعدناني = سني وذمي وشيعي واختلاف المله
قدوتي منهج محمد سيد الاحسانِ= هم دينه لين ربي تممه له شله
لا تقول لمن يعارض فكرتك غلطاني = بالكلام الطيَّب ادمح عن خطاه وسله
لين يقبل رأيك ويصبح من الاعواني=وإن بقي في كبوته فاكرم نباه وخله
وأعرف إن الهرج زبده واللسان حصاني=كلمتك تستقطب العالم ولك تحتله
كلمةٍ ترجح بكلمه والخطا بيباني = والعمل محسوب وبتلقاه دق وجله
القوافي نبع فكري والشعر ميداني= يا الهي دل قولي لا يجي به خله