عشر الاواخر اقبلت يا اهل العقول=مدري نعيش من بعدها ولا نموت
اخر خيوط الفجر يسرقها الافول=واخر محطه قطرها قرّب يفوت
الورد ما له شم من بعد الذبول=واهل المصايب شاحبه حسره وصوت
يالي بضايق نفس في العشر الحلول=اوقف ببابه واطلبه كافي سكوت
ارمي حمولك تنتهي كل الحمول=واسال عظيم الشان عفوه والثبوت
شمــّـر عن الساعد وسابق للخيول=لا تنتحر بالياس يا يونس بحوت
انوي بها بالعزم في ليلك تطول=والي يبي الجنه يعمــّـر له بيوت
قبل الندم يا خوه اسمع ما يقول=خلي النصيحه زاد فيها كل قوت
انفض غبار ابليس من ثوب الخمول=والبس ثياب الخوف وابكي بالقنوت
ما احلى عيونك باكيه واقف خجول=قدام راحم قد فتح بابه تفوت
عشر الاواخر ما تشابــّها الفصول=فيها بطايق شحن ماهي كالكروت
فيها مواسم حرث ما هي كالحقول=فيها الحدايق غير ما تمره وتوت
يا حسرت اليّ من ثمرها ما ينول=اكبر خساره من لفرصتها يشوت
العمر شمعه عمرها مســّـرع عجول=واخر سنين العمر يسببقها الخفوت
عشر الاواخر اقبلت يا اهل العقول=مدري نعيش من بعدها ولا نموت