ثلاث الليالي في غيابـك.. ثـلاث سنيـن =أجل كيف لو غبتي شهر.. وش يجي فيني
أحس الدقيقـه رمـح.. والثانيـه سكيـن =الى حلـت الذكـرى.. تقطّـع شرايينـي
اذا جيت باب البيت.. حارت بي الرجليـن =تقول الزلازل.. تنتفـض تحـت رجلينـي
واشوف الشوارع في غيابك.. لها وجهين =عمود الإنـاره فـي طريقـي.. يعزينـي
وأشوف الحديقه.. كنها المقبـره بالعيـن =بها الورد والريحـان.. ماعـاد يغرينـي
ألف المدينه.. بـس أدور طريقـك ويـن =على دربك المشؤووووم.. ضاعت عناويني
سألت القمر.. عن حالة العاشق المسكيـن =لقيـت القمـر يبكـي ..بـدل مايسلينـي
غيابك غياب النـور.. بعيونـي الثنتيـن =علي الطّلاق.. إنك تسـاوي نظـر عينـي
أبي تاخذ الموضوع ..جد وتجي هالحيـن =ذبحني( منام الثلـج )..شوفـك يدفينـي
تهاوت علوم الصبر.. والمرجلـه والديـن =خلاص أعترف لك.. ماجرى لـي يكفينـي
ترى القلب من شوفة ثيابك.. غدا قسميـن =الـى شفـت دولاب الملابـس يبكيـنـي