يكفي كفا كافي جرحتي فؤادي= جرح ٍ قديم وزاد فيني لهيبه
لازاد حكي ٍ زاد فيه التمادي=زادت جروح اللي جروحه عطيبه
أنا قنبت بغاب موحش وهادي= والذيب مايعتاش لولا قنيبه
عويت عوي ٍ من عناي وهجادي=واللي قنب حولي من الغاب..( ذيبه )
ماهو غريب أقانب الذيب عادي=إذا قنبت لغير ذيب .. الغريبه
ذيبه وأبوها ذيب للغاب سادي=وغير أحرش العرقوب ماينعدي به
عوت معي عوي ٍ من الليل بادي=أرق وأعذب من أغاني (نديبه)
بي عويت ٍ يطرب لها كل شادي=ضاعت لك الله في ضروف ٍ عصيبه
أنا حزين وصار حزني بلادي=وما ضل ذيب ٍ فالحياه أنتخي به
أزرع وفا وألقا الجفا هو حصادي=طيّب ولا فاده مع البعض طيبه
ماذاقت عيوني لذيذ الرقادي=من يوم ماغابت عيون الحبيبه
عشان قل المال زاد انتقادي=ماتدري إن الكل ياخذ نصيبه
ياللي تعيب الفقر جاك الوكادي=الفقر فقر النفس ياللي تعيبه
( نعشي الجيعان لو ماش زادي)=شي ٍ بديته فالحياه .. أنتهي به
أنا قنبت بغاب موحش وهادي=واللي قنب حولي من الغاب ذيبه