لا .. جاني الموت يلقى في فمي بــَـسمه=أموت شامخ ولا احيا منكسر بالخوف
كم صاحب(ن) لي توادعنا بلا كلمه=واخر وداعي لـِـمسته بالكفن ملفوف
يرحل وتبقى لي الذكرى مع إسمه=ذكرى مع الصمت تصرخ من عميق الجوف
يا قسوة الحزن يا مثــّقله في دَمه=ما فاتني رغم وجهي بالأسى مخطوف
في ذمتي لا نويت احلف على ذمه=إن الحياه ما تساوي شعرة(ن) من صوف
وخوف قلبي عليكي بس يا يــُــمــّـه=كان بعت دنياي في لحظه لها بالعــُـوف
يــُــمــّـ .. الوفا وين ضايغ داخل الزحمه=يشكي وروحه قتــّــلها ناكر المعروف
عطر الوفا عاف صدر الناس من شــََـمه=وصار يهجيه جاحد في ســَـخى ملقوف
يا صعب تسقط مبادينا من القمه=تهويّ بلا ذنب في قــَـعر الزمن يا نوف
الكسر والنصب ويــّـا الشــّـد والضمه=من غيرها الحرف لا ينطق ولا بيشوف
كذا المبادي بلا معنى بلا .. لــَـزمه=مثل الغصون العقيمه ما لها مقطوف
يالقهر كافي ترى ما عاد في شحمه=ما تحرقه صار عظمه للهوى مكشوف
لا عاد يبصر ولا يفقه على رسمه=واخر بقاياه يمكن تشبه الغضروف
ما دام روحي بصدري تــِــشبه النسمه=ما انا عليها بولهان (ن) ولا ملهوف
لا .. جاني الموت يلقى في فمي بــَـسمه=أموت شامخ ولا احيا منكسر بالخوف