طارت بي افكاري ولجلج قريني=الحلم يدعـيني وانا اقول لبيه
لوما اتعوذ من ابليس اللعـيني=خاويت فكري للمتاهات والتيه
الخوف في وقت الفرح يعـتريني=القلب روعه عاصفاً به واهدّيه
اضحك وانا همي بقلبي دفيني=بين الضلوع عن الشماميت مخفيه
صبري قضى والصعـلكه تحتريني=لكن حرام الحر يخلف مباديه
حراً طليق وفي شعوري سجيني=سجناً بلا حارس همومي مبانيه
كني رهين وعايش المحبسيني=يبخل عليه اللي بدربه يقديه
اكتب روايات العذاب بيديني=وأرسم متاهات السراب ومظاميه
واقرا قصيد السامري والهجيني=والـحّنه لحن التعاسه واغنيه
عاقل واجاري كل عقلاً فطيني=مجنون جاهل يطفي الشمع بـيديه
يامي ياللهول وينك وويني=حبيبك الاول عسى مانسيـتيه
يامي لو طال الفراق اذكريني=قد تجمع الايام غالي لغاليه
يا مي لو صار الخطا سامحيني=تأكدي ماكنت قاصد وناويه
ماهو خطاك انتي خطاي افهميني=أو هو خطا حظي عسى الله يجازيه
حالت ظروف الوقت بينك وبيني=وذنوب غيري عالي العزم تثنيه
مات الطموح اهمال قدام عيني=مات الطموح العام واحاول احييه
سكرت والسكره خذت بي سنيني=صحيت لكن ضيع الركب حاديه
مضمون همس الروح للاصغريني=همي ٍ غريب ويشرح الصدر طاريه
أشري بعمري رفقة الطيـبـيني=اللي لهم بطيور سنجار تشبيه
اقدم الطيب على القادميني=واللاش اوريه الجفا خاب راجيه
من له بضعف النفس كنزاً ثميني=يتبع علي بابا ويمشي مماشيه
اهل المغاره شلة الاربعيني=اسطورةٍ فيها حقايق وتمويه
ماكل ظن مصيب مار اعذريني=شوي رحمه ياسيوف المشاريه
بلسان حال فلان لاتطعنيني=أحس باحساسه واقدر هقاويه
شرهة عزيز الناس فوق الجبيني=تاج تشرفني مشاريه راعيه
والشرهه اللي من لئيماً تجيـني=والله يبطي عظم ماجيت اراضيه
من يدّي المجهود عذره سميني=هذا هو المعروف باسما معانيه
لوم وعتاب ولاتزعزع يقيني=مانا مسوي شي ماالله مسويه
مانا نبي الله عصاي بيميني=اهش به على الثعابين وارميه
ما المشكله من سيد العارفيني=هذاك مايحتاج نصحاً وتوجيه
عانيت هم ٍ باح منه الكنيني=لو راح جاء الثاني ورديت اعانيه

عبدالله المفضلي الشمري

صح السانك
مبدع كعادتك
لاهنت

ماكل ظن مصيب مـار اعذرينـي=شوي رحمه ياسيـوف المشاريـه
بلسـان حـال فـلان لاتطعنينـي=أحس باحساسه واقـدر هقاويـه
شرهة عزيز الناس فوق الجبينـي=تاج تشرفنـي مشاريـه راعيـه
والشرهه اللي من لئيمـاً تجينـي=والله يبطي عظم ماجيت اراضيـه
من يدّي المجهود عـذره سمينـي=هذا هو المعروف باسمـا معانيـه

عبدالله المفضلي الشمري
لله درك على هذا الابداع
قصده رائعه اجبرتني على اعادة قرائتها اكثرمن مره
صح لسانك وصح فكرك
تقبل فائق احترامي