القلب ضايع بين شفه وضيقه=والعين تسهر والخلايق ينامون
وحمل الهوى متني عجز لايطيقه=ياليتكم باللي وطاني تحسون
تدرون بان اللي كتبته حقيقه=ماهو خيال الشاعر اللي تخبرون
كل من أسرار الضمير الرقيقه=من صادق احساسي تفجرت بلحون
على الذي يسوى جميع الخليقه=غروٍ على جاله ظهر كل مكنون
وجه السعد راعي الجذور العريقه=سمح النبا عن درب الأدناس مصيون
خافي ولايلمع لغيري بريقه=مير ان جدانه للأدباش يفنون
قربه برادٍ لي وبعده حريقه=الله يروف ان كانكم ماتروفون
بين الرجا والياس عيني مويقه=والعمر مع مدعوج الأعيان مرهون
حاير فكر وجروح قلبي عميقه=أضحك وأنا من داخل الروح مغبون
يقوله اللي نشّف الوقت ريقه=رجواي باللي في يده دبرة الكون
مالي سوى نشر القصايد طريقه=يمكن على حال المشقّى تحنّون