بين تجديد القصيد وبين مفهوم الرتابه=بمتطي صهوة جوادك يالحروف الأبجديه

دامني شاعر واعن القاف بأسلوب وصلابه=درهمي لي واقبلي بالهون يابنت العبيّه

شايفٍ لي حاجةٍ ماهي من حدود الرقابه=حولها كل الطموح ودونها حلم الأبيه

هو صحيح ان البشر بأشكالها دايم تشابه=لكن المضمون يفرق بين ذيك وبين ذيّه

مهرةٍ فيها على أهل العشق سجّه وانقلابه=ما يروضها سوى اللي له عليها مقدريّه

رمشها ماكنه الا قايدٍ جهّز حرابه=وخشمها سلّة سيوف الهند والا الحضرميّه

عنقها عنق الغزال ولونها لون السحابه=ونقشها في كفها مثل الرسوم البابليه

والشعر لا التف حول الجيد الأتلع والتوابه=داخل بخصره من أفعال الرياح الموسميّه

كل مافيها غريب وتمتلك طبع الغرابه=فعل مجنونة صبا ممزوج مع قلب أجوديه

ما يخوفني عليها غير عيشتها بغابه=ترتع بقمة فرح في ثغرها بسمة نديّه

مادرت بأن العيون اللي تراقبها ذيابه=تنتظر في أي لحظة تفترس أيّت ضحيّه

دامني شاعر واعن القاف بأسلوب وصلابه
............. (درهمي) لي واقبلي بالهون يابنـت العبيّـه