شبكة رهب الأدبية-ريما محمد السديري

"طـــــيف "

هنا أتيت لكم برائعة
للشاعر /ســــالم سيــــار
واتمنى تستمتعون معي بقراءتها

تجيني طيف ياعمري على جنحان شوقي لك
أخاف ارمش من عيوني وأبعثرجية اوصالك
حبيبي لاتجيني قول وين انت وأنا اجي لك
أبيك تقول وين انت وعلى عيوني أنا أسعا لك
وربي فوق روس الشوك لخلي القلب يمشي لك
وأخلي ظلالي يسبقني قبل يحضني منزالك
ثواني بس ابتهندم من عيونك وابهدي لك
في عينك ضحكة حتى تكحل عين عذالك
يقول الناس في غيابي يشب القلب ويضوي لك
حنيني ومن وهج شوقه يميل القلب لامالك
قضى دمعي من عيوني ابي من عينك ابكي لك
ابنثر من ورى عيوني دموع عيون ترحالك
تعبت أهرب من الأشياء البسيطة من تفاصيلك
تعبت اسأل زوايا البيت عن اول وآخر أحوالك
وحتى الشوق من صبح الدرايش قام يهديلك
عصافير الرضا ترفرف على بيبان مدخالك
هنا ترمي صباح الخيرقبل لاتروح وادعي لك
وهنا تضوي مساء الخير في عيني من اهلابك
انا من الليل يقطفني شعوري لك وأغني لك
انا من الصبح يليلني الحزن من لون موالك
حرام الليل ماهو ليل اذا ماكنت في ليليك
وحرام الصبح ماهو صبح إذا ماكنت في ظلالك
تروح وقلت احط روحي على كفي واناديلك
نزعت العمر من شفت الغلا بالروح نادالك
بربك قول وش سوى الفراق بوجه منديلك
تسيل ألوان طيفي فيه الا منه البكا سالك
حبيبي حبيبي لايبكيك الفراق ولايهد حيلك
أخاف الدمع من عينك يجفف صورتي ببالك
تعال أحتاج اسولف لك عن الأيام وأشكي لك
وافض غيم الحزن وانثر حنين الشوق بقبالك
تعال وحط في بقلبي هموم الفرقى واشيلك
لأن القلب ماهو قلب إذا في نبضة ماشالك
وقف دمعي من عيوني ابي من عينك ابكي لك
أخاف ابكي من عيوني وابعثر جية اوصالك