من حر لوعات الفراق اشتكينا=راعي الهوى مجنون والشوق حراق
نكذب أذا قلنا خلاص انتهينا=ونصدق أذا قلنا الى الموت عشاق
هاذي سوايا لعنة الحب فينا=وصل وهنا وافراح واتراح وفراق
ياشينها يوم انتهينا بدينا=نرجع كما كنا مواليف واشفاق
بالله يالايام جودي علينا=تذكري قولت ولاقطع الارزاق
للوصل وسرور الحياة اتركينا=كوني سلام وثلج يا نار الأشواق
أن صاح صياح الغرام لحدينا=جاله من الثاني رسالة وميثاق
ياما على النجم الشمالي سرينا=في ليلةٍ فيها عراقيل وأعواق
ياما على رجف القلوب التقينا=في موعدٍ له هايم الروح ينساق
طعنا تصاريف الزمان وعصينا=وشفنا نجوم القايلة والفضا ضاق
راحت سنين وتونا ماسلينا=مثل السكارى والمحبة بالأعماق
من منهل الحب الزلال ارتوينا=باجسادنا يجري للارواح ترياق
بعنا بسوق أهل الغرام وشرينا=والناس مختلفين بانواع الأذواق
نسقي ورود العاطفه في يدينا=واحلامنا رحبه كما رحب الأفاق
لولا الأمل ياهل الحسد ما بقينا=نشوف له في مقدم المزن براق
اشوف باقصا اليم ساحل ومينا=هو حلم والا علم ياشوف الأحداق