العام هذا راح وولت ركايبه =واقبل علينا عام ننطر عجايبه
عام ٍ جديد وعام قبل امس قد رحل=واللي مفارق او ملاقي حبايبه
ايامنا تمضي وحنا نشوفها= تنقص وبعض الناس ماهيب تايبه
يالادمي لازاد عمرك ترى نقص =الموت ماخلى من الناس سايبه
كل عام وانت بخير يامن نصحتني =يالله عسى جملة لياليك طايبه
كل عام وانت بخير يامن فزعتلي =انا شهد امك يابن الاجواد جايبه
كل عام وانت بخير يامن تعزّني =واللي كرهني جعل تكثر ذهايبه
كل عام والويلان ربعي وعزوتي =في خير والمغرض يطيح بنكايبه
ربعي وساع البال ركّابة الهجن = ربعي كعام الضد في كل هايبه
ربعي جموع الجن في ساحة الوغى =لاشمو البارود نسنس هبايبه
ربعي هل الفزعات ربعي هل الوفا= ربعي وذخري بالزمان ونوايبه
كل قوم ٍ الا ربعي وذخري (عنزة)=مقولت ٍ ماهي عن الناس غايبه
ماهو قصور ٍ بالقبايل ومجدها =كل ٍ يهيم ويعتزي في قرايبه
نطيت في راس الرقيبه وانا فرج =وامعنت ناس ٍ كل ماقلت خايبه
ناس ٍ تعاني من تضخم بروسها =تفرزصديد ٍ ماعرف وش سبايبه
حقد وحسد مع كره مزمن وملتهب =اعمى عيون ٍ بالوساويس شايبه
نطلب لهم من ربنا الشافي الشفى =يالله تشفي مبتلى ٍ من صوايبه
ونطلب لنا من ربنا الكافي العلي =المنعم اللي ماتعدد وهايبه
ياربنا لاتبتلينا وعافنا =انت الرجا للي تنامت نشايبه
هذا وصلى الله على محمد النبي =عد الغشين اللي لفا من سحايبه

المشاركة الأصلية كتبت بواسطة سفير المعاني (المشاركة 228967) الغالي الشاعر فرج الدهمشي الله انه يسعدك ويوفقك بجميع اوقاتك اسعدني ان اكون اول المصافحين لهذه القصيده المعبره بما فيها من مضمون وتصوير للزمن وكفو بك وبجماعتك وصح لسانك وعلا شانك ولا هنت وتقبل تحياتي

صح بدنك وأشكرك على هذذا المرور الرائع والأطراء الجميل أسعدني كثيرا ..

المشاركة الأصلية كتبت بواسطة .. شمـ ع ـة أمـل .. (المشاركة 228968) فرج الدهمشي صح لسانك .. لا هنت ولا هان منطوووقك .. تقديري لك ..

المشاركة الأصلية كتبت بواسطة أنا (المشاركة 228976) فرج كل عام وانت بخير نص به حكم ..وعبر ..ووجد ..ومجد ..ومناجات خالق.. نص تجذبك له انسيابيته ..وشاعريته ..نبعه صافي .,واحساسه دافي,,وقممه شامخه .. فرج تحياتي ..ودمت بخير