رحابة الكون وافاق الفضاء والسنين=زادت وكوني عجز لايقبل الاتساع
يحكمني الليل في وجه النهار المبين=وتغيب شمس النهار اللي تمد الشعاع
وحسرات قلبي وتنهيدات صدرن متين=تنبي بصبري على ضيم وقهر وإنقطاع
أقبل عجاج العمر واقفى الزمان الحسين=وتشتت وجهة الاحباب بعد اجتماع
ماعاد باقي معي غير الحزن والحنين=حزين والحزن اخذ مني صفه وانطباع
وقفت حائر ومحتار القدم والدفين=سري ولكن دمعي خاني يوم ماع
ولو إن في بعض خلق الله تقوى ودين=ماكدّروا حالة العاشق نهار الوداع
وقف ودمعه على خده ووجه حزين=وقفات اسير بيوم الحرب لوهو شجاع
كذا بدت حالتي هائم وحالي رهين=للي غلاها ملكني ماسمعت الرعاع
مؤمن بما في وسط قلبي وربي يعين=واجاهد الذل والتحطيم والانصياع
آخذ من الحاضر الزاهر عنى الاولين=قساوه وفقر وبطونن ضوامي جياع
وتتحطم امال عمري واحسد الميتين=واشوف مستقبلي بين الامل والضياع
غرابة اغرب عمر في عالم العاشقين=غربة عمر مستمده من غريب الطباع
تتعبني الريح وامواج البحر كل حين=كني سفينه شراعيه بليا شراع
وإن ضاعت احلام عمري لو عمري ثمين=اصون عهد المحبه والغلا مايباع