بدت بدري ثلاثيني وانا واقف على الأحزان=أشيل بداخلي قلب(ن) ثقيل بسبّة أحزانه
وترى لا شفتني ضايق فلا تزعل علي( سلطان)=ولا تحسب بان دمعي على (شيخة)و(سلطانه)
أنا أبرك أشيل الحمل وان كانك تبي البرهان=تعال وشوف كيّات الزمان وشوف برهانه
واذا كانك تبي قصّة ثلاثيني مع الأزمان=تعال اجلس تعال أسمع شقى عمري بأزمانه
انا واحد مثل غيري ربى جنبه عشر غرّان=ابونا العود كم ضحّى لاجل اسعاد غرّانه
وانا واحد بدا بدري يحس بلوعة الحرمان=عسى غاليك ما يطعم مثل جوعه وحرمانه
تعدّى مرحلة انه يوطّي نفسه لانسان=وتعدّى مرحلة انه يموت بحب إنسانه
تعلّم كيف لا شاف الفقير المنهك التعبان=يراعي وبأدب مطلق مشاعر ناس تعبانه
بدا يكبر بدا جرح (أ)تّفرّع منه الأغصان=وهو جرح وكسر ظهره فما بالك بأغصانه
بدا يرسم أماني كثير ويزيّن بها البنيان=وفي لحظه حدث زلزال هدّم كل بنيانه
وقف شامخ على أنقاض مستقبل على الجدران=وهو ضايق ومتأثّر على انقاض جدرانه
صحيح انه عرف انه غدا في دنيته خسران=طبيعي من صغر سنّه وهو دنياه خسرانه
وترى والله (يا سلطان) لولا نعمة النسيان=فلا أقدر على نسيان ماضي صعب نسيانه
درست كثير عن حب المواطن كلمة (الأوطان)=إلين أيقظ مفاهيمي (علي السبعان) واوطانه
يمر الوقت والدنيا تعلّمني من الغلطان=ومع الايام أتفاجأ بأن دنياي غلطانه