رسالهـ لكـ .. يا زبون الغفله ..[ بقلمي ]
 

قليل من الجهل لا يحملني الخطيئه ويجعل مني شيطان بهيئة بشر !!



فالكل خطاء وآفة البشر الجهل والنسيان ..



فلست بملاك قد حرمت عليه الخطيئه ونزع من ذاته النسيان ..



فأنا كمن حولي مجر بشر يخطئ ويصيب حسب تدوينات القدر ..



فيا أيها الزبون خطيئتي لا تعطيك الحق بأن تتلفظ بما لا يليق ..


فالكلمة الحسنه دائما هي سيدة الموقف .. وحاسمة الأمر !!



لذا ثق تمام الثقة أني لن أ دخل مالا حرام


لا لمحفظة نقودي ولا لمحفظة من وظفني..



ثم كيف يحق لك أن تزدري قانون السعوده


لأجل ريال واحد بقول :



هذا ما أخذناه من السعوده ..!



ألا تعلم أن لولا السعوده لأصبح الفرق


ريال وبجانبه تؤم من الأصفار ..


أم أن أكل جارتنا وأن كان سما عسل على قلبك وأكل أمنا فيه من


الأملاح ما يجعله سبب رئيسي لرفعة ضغطتك وتعاستك ..



نعم نعم .. دائما نحن هكذا يالسعودين


نفضل أكل الجيران مهما يكن ..


يا أم فلان مشتهي أكل من أيدك اليوم وان تعبت نفسها أم زعيط


وهبت للمطبخ وطبخت لأبو معيط ما آكل من أيد


ست الحسن والدلال لأن حضرته متعشي برا ..



هذا أنتم يالسعودين ذبحتونا وهريتم مكتب


العمل والعمال مقالات وأنتقادات :



نبي سعوده ... ليش ما سعودتم ... قانون السعوده صادر من


عام أسبله ولا طبق ...



ويوم شمر عن ساعديه مكتب العمل والعمال وطبق القانون ..


كشرتم خشتكم لسعودي و رحتم لم الأجنبي ..



الحرمه لا شافت بالمحل سعودي ضاقت بها الارض


ذرعا وأصدرت كلماتها المعهوده :



يووه سعودي ..



وأن غلط بالحسبه :



ما الومك سعودي !



والرجال لا شاف سعودي هلا هلا بالسعودي ..


الله الله بالتخفيض يا أبن البلد ، كأن أبن البلد


يعطي من كيسه !!



وابن البلد ولد شهم وسنافي يرد على


الزبون أبشر بالي يرضيك ..



يحسب ويحسب حتى يوصل لنهاية الحساب ، فيسأله الزبون :



هام بشر كم الحساب ..؟!



يرد أبن البلد :



مبلغ وقدره وتراني راعيتك قد ما أقدر ..



يرد الزبون :



يا وجه الله أبك علامكم زايدين الاسعار ..


بعدين يا رجال ما عاد نبيكم تراعون


عسان بس نسلم من الزياده !!



يبتسم أبن البلد وفي داخله يقول :



ما خذ نص المحل وتقول غالين الشره والله علي ماهي عليك !!



عجبا لكم إيها السعوديون وأكاد أقسم ثلاثا أن المثل القائل :



ما يعجبك العجب ولا الصيام في رجب !!



قد ضرب في زبون مااا ..!!



أقتراح :


على مكتب العمل والعمال أصدار


بند جديد يطبق في جميع المنشأت التجاريه


يلزمها بدفع بدل مالي للعامل السعودي الا وهو :


بدل سعوده !!

مجنون القلم

كلامك يحمل شيء من الصحة وشيء من التهويل للامر

فانا أعرف كثر نسعد عندما نرى ابن البلد عمل عملا" بغض النظر ما هو هذا العمل ولكن يكفيه شر السؤال وشر الفراغ

ومع الاسف اكثر الشباب السعودي يهمه نظرة الناس لعمله وليس ما يحتاجه والا لماذا نرى العمل المهنى مهجور من قبلهم .
و صحيح انا معك انه يجب ان يكون العمل للسعوديين يحفظ كرامتهم ولا ننسى ان أكثر الآسر ترفض أن يعمل ابناءها اي عمل والسلام.

وفي الآخير انت وغيرك من يقرر ماذا تريد وليس المتلقى وباسلوبك تجبر غيرك على تقبلك مهما كان.

عذرا للآطالة

دمت بخير وسعادة

مجنون القلم
بالعكس اخوي انا ارى ان كثير مننا يفرح عندما يرى البائع بالمحل سعودي والسعودي هو اكثر واحد تكاسره اذا على المكاسر واذا على الحريم هذاك اول ولكن بعد ماظهرت فضائح العماله الأجنبيه ومشكلهم تغير الوضع
والشاب السعودي امين ويخاف ربه
ابضرب لك مثال عندنا الورشات
الناس بس تسأل وتدور على الميكانيكي السعودي لان شغله ممتاز وعنده امانه مو مثل الأجنبي يقل فكيت كذا ومدري ايش تقول فاك السياره كلها وانا من الصبح اشتغل ومن هالكلام ونص القطع اللي عندك صالحه مغيرها ومركب قطع تخرب بعد فتره علشان ترجع له
السعودي غير...
بس لي تعليق بسيط على الراتب
اللحين تطالبون الشباب السعودي بالسعوده على ايش ..
على راتب 1500 دوامين الصبح ومن 4 العصر الى 10 يالليل
او دوام 8 ساعات خافوا الله
اول شي 1500 وش تبي تزين قسم بالله حقت فواتير وبانزين وكم شغله يعني يمكن لاحظ كلمة يمكن تكفي اللي عايش عند ابوه ماكل شارب نايم يمكن تكفيه
بس اللي ساكن الحاله قسم بالله هذي حقت مقاضي بس من غير الشقه والباقي عليكم
ولا اذا كان يصرف على عائلته كم يكفيه هذا حق اول يوم بس
مجمل رواتب السعوديين المهنيين من 1500 الى 3000 اللي راتبه ثلاثه يعتبر نفسه وزير حتى الثلاثه والله ماتكفي مع غلا الأسعار وغلا كل شي بكرا يبون ينزلون نظام جديد اذا وقفت عند بيتك لازم تدفع بعد اي زمنن هذا ..............!
تبي الشعب السعودي كله ينزل مهني
ارفع الرواتب وشف الشغل
الوظيفه تعبانه + ضغط العمل وفترتين + اهانة الزبائن + 1500 =انتحار
الوظيفه تعبانه + ضغط العمل ولو تبي ثلاث فترات + اهانة الزبائن + 7000 = ماتلقى ولا سعودي عاطل

اعتذر عن الإطاله
بس اخوي الكلام اللي تتكلم عنه يمكن يمثل فئة نادره
والشي النادر لامقياس عليه

تحياتي لك ولقلمك المميز