يالله يا معبود يارب الانام = يا مرسل الطوفان ويا منجيـــ (ن)*نوح
أنت العليم بغيب الايام علام=ومقدر الاقدار من خلقة اللوح
ومن بعد ذكر الله بدعنا على شمام=من منبع(ن) مناهله مابها شحوح
وسقنا على جزل(ن)* زلال(ن)* بلا خطام =أبكار فكر(ن)* سوقها نظم وشروح
مزن(ن) عرض فيه الرعد يرزم ارزام=برقه لعج ليه ولافيه مجنوح
تمطر هماليله مقادير واقسام= وتضرس معاصيره طواحينها موح
وياحي رؤس اقلام سوق(ن)* بالالهام = تصخير سبك القاف بالعرف مملوح
أوجز على مؤجز وثق بالاحكام=من مختلج بين المعاليق ملفوح
على عديم(ن)* للعسيرات كعام=سمح المحيا يقرن الهرج بمزوح
كريم ماعاقه مداخيل والجام =يبجس طناخه قلطته مابها اكبوح
ساطي على حصن المواجيب لزام=لاخاب خطو الي عن العلم سرسوح
عليه قلبي كانـــه بكاس حجــام =يدفق غزير النزف من جرح مفذوح
ياعنك يا محمد زعيم(ن)* وضرغام=وركنـ(ن)* ركيـ (ن)* طاح والصبر ممدوح
مات الملك فيصل على نهج الاسلام= والمملكه ترقى فخر يشمخ انطوح
وان كان دمع العود بالخد وسام=حنا العوض دام العمر مابه انزوح
وزمل التخوت صدورها به تهشام=تكسر بخاطرها ولاتبدي انضوح
أمر مقدر قبل يخلق أبو سام=ولاحل توقيت القضاء جاك مشطوح
ويارب تغفر له ذنوبه والاثام=وقبره على مد النظر فيه مفسوح
ويوم الحشر مع سبعه ابظلك اعصام=ويسكن بجناتك جزاء منك ممنوح
وختامها تمت على مقصد (ن)* هــــام = للخالدي رد(ن)* به العفو مطروح

دام السوالف بالمجالس له إيام = أنا كتمت السالفه داخلي فوح
ياشين دمع العود لا واجه إيتام=يدفن غبن سم(ن) على القلب ذرنوح
كم سنبله ينخر بها قطع الارحام=وموسم رياح الحقد تحصد بها روح
أحد(ن) حسبها مال واولاد وارقام = وأحد(ن) حسبها صح بكره يبي يروح
دنياك مادامت ولاعمرها دام=وش عاد لو نكنز ملايين وصروح
كم واحد(ن) نوخ ذلوله ولاقام=يمسي يبي يصبح على كسب مصلوح
والسالفه ماسقتها عند لــطام=والعرف يبغاله رجل يبعد الشوح
لأشان وجه الوقت عندي له احزام=وقبلي نصاه الي من الضيم مشفوح
حرف(ن) لبوباسل على روس الاقلام=سرابه الهاجس قبل يشعق الضوح
قله ترى محمد له إيام مانام =وخسارته من جورها يكثر النوح
وآآآخوي ستر الجار بالطيب مقدام= يفقده باب(ن) للمسايير مفتوح
وآآآخوي لو ابكيه عام ورى عام=مانساه لوفكري سهج فيه ساروح
ياما صبر والهرج يقدح به أشتام=يا ما صبر والذم عود على الطوح
ماطاوع العائل على نية اخصام=حليم خاطر والخطا صار مدموح
ياطيب سنـــمار !! في بني الاهرام= غدر به النعمان خلاه مذبوح
وختامها وقعت في بصمة أبهام = ان الضغينه شوك في شجرة الدوح