عيالكم وبناتكم يعرفون عائلتهم؟؟!!
 

في الكويت القديمة كل افراد العائلة وعيالهم وبناتهم يعرفون اصولهم ومن وين يايين وعروقهم وكل شيء عن العائلة لأن أبوهم قبل لا يروح السوق يسمّع لهم اصولهم من اي فخذ يايين واي قبيلة كل يوم.

الحين الوضع غير عن أول الحين العيال ما يعرفون عيال عمهم ولا عيال خالهم ولا خالتهم خصوصاً طلاب وطالبات المدارس الخاصة قاموا يخلطون بين المصطلحات العربية والاجنبية وما يعرفون خالتي من عمتي ولا خالي من عمي واذا سألتهم شنو يصير لك قالت هذا ماي كزن وماي سكند كزن وماي سكند سكند كزن بس هذا حدهم والكزن هذي حق الخال والخالة والعم والعمة. يا جماعة علموا عيالكم عن اقربائهم واصولهم للمستقبل الواحد صار ما يعرف اهله ولا عيال عمه ولا عيال خاله ولو يتقابل وياهم في السوق ما يعرفهم. طبعا أنا أتكلم من واقع ومن خبرة مع طالبات وطلبة الجامعة. علموهم عن أصول الناس وما هي مكونات المجتمع الكويتي.

لازم يعرفون أسرتهم حتى لا يحدث تفكك اسري وحتى اسرتهم تكون سنداً لهم في وقت الأزمات. لأنهم يعيشون في اسرة والاسرة في شقين اسرة الأب وأسرة الأم والمشكلة انه عيالكم وبناتكم ما يعرفون تسلسل الأسرتين لذلك اي واحد يقدر يضحك على بناتكم لأن هناك بعض النصابين اللي يدورون في الشوارع ويركب سيارة فاخرة مؤجرة ويقول لهم أنا ولد فلان وأمي بنت فلان كذلك هناك بعض البنات يقولن حنا بنات فلان وعائلتي العائلة الفلانية وهذي النوعية من البنات للأسف تلقاهن في بيروت والقاهرة ودبي ولندن وينتحلون اسماء اسر كويتية كريمة ومحترمة وفي النهاية يطلعون من جنسيات اخرى غير كويتية. لذلك يجب عليكم تعليم بناتكم وعيالكم عن عائلتكم حتى لا يكونوا صيداً سهلاً للنصابين والنصابات. والله يحفظ الجميع. والله ولي التوفيق. ومع السلامة.


بقلم : د. خالد الشلال