اسر ياليل والمسرا بعيـد وساعتـك برفـوق =عقـارب ساعتـك ياليـل مـادارت دقايقهـا
علينا طرقةٍ ما هي بطرقة عاشـق ومعشـوق=هدف عيني مداه أبعد من طويـق وشواهقهـا
قبل يفضح شروق الصبح جرحٍ بالظهر مدفوق=تنّحر بـي علـى دارٍ بعيـد ينـوض بارقهـا
أسولف وأتسيجج وأبدع المـوال والطـاروق=أقـدّم هيبـة العمـلاق ولـو مانـي بطايقهـا
لو ان القلب ماباحت سدوده يعتبـر صنـدوق=لو ان بعض الهقاوي عزمها بالجيـد سايقهـا
مابين النار ياكبدي وحـد الخنجـر المفتـوق=عزومش فوق مدام الظفـر والجيـد رافقهـا
يقولون الجمايل في رقاب اهل المعرفه طـوق=مصيبه لـو تضيـع فعـول صانعهـا لبايقهـا
درسنا في الزمان اللي يبّين معـدنٍ المرمـوق=مدارس وقتنا بانـت خوافـي مـن حقايقهـا
تجارب والظروف بلطمها رسمٍ رسخ موثـوق=نبيه القلب ضوه في خلا الصكـات شاعقهـا
محاصيل التجارب والحصاد أنتج ثمر وعذوق=ولكـن مـا يميّـز بينهـا يـا كـون ذايقهـا
كِثر الخير الصداقه والصديق اللي جهِله حقوق=تّردت هقوةِ فـوق الجـدي حـدّت نطايقهـا
تجوّدت بحبل شيمه واثر حبل الشيم مطلـوق=حسبت احساب نطق النفس غاويها وصادقهـا
عليك اللوم ياوجه الردى ياهـازل المنطـوق=قبل لا تشوف عيب الناس عيوبك غب عاتقهـا
مدام ان الخطا ورّد حيامه والخطـا مفهـوق=مطاياك الجـرب ياحافـي الآقـدام ماحقهـا
هذاك طويق ما اهتزت ركونه يا عديم الـذوق=وجحازيم الخلا تفنى من المـزن وصواعقهـا
ختام السالفه بيـتٍ يترجـم كلمـة المخنـوق=عليه اوسوم فكري بعد ما حميّـت مطارقهـا
أبفارق ديار اللاش وأدمـح زلـة المطفـوق=لجل ما اخسر وجيه اللي على العليا نصادقها