يابو صقر هالسوق وش فيه مربـوط=شف لك معه دبـره بشيلـه وحطـه
دقق ومحص وإرسم (الشارت)مضبوط=وكانـه معـورج لازم إنـك تمطـه
حاول تسند به على أقـرب خطـوط=ولا لاتوقف بـه علـى أيـة محطـه
وإن شفت لك سهم على الدرب مقروط=وخّر كفـرك شـوي وإحـذر يبطـه
ومن عقب ماتاخذ مع القار لك شـوط=عطني هنا رأيك وأبـي منـك خطـه
قلي نتيجـة مارسمتـة مـن شخـوط=يااننتـظـر بالـسـوق والا نقـطـه

كان لتلك الابيات أثر في داخلي فأبت الإ إن تنبش جمراً وتخرج قصيدة ولو بعيداً عن القافية فجاءت هكذا


حديث الشارت

ياصاحبي صاحبك ماهـوب مشهـور=لكن صدق حدسـه وعلمـه وجدهـا
والعذر كـان غيابنـا سبـب قصـور=في موسـم طيـور الحمـاد وهددهـا
عشناغياب الشمس والغيـم بحضـور=راحـة فكـر يالله تكمـل سعـدهـا
والبارحـة للصبـح والليـل معـذور=من كل صوب البـرق قـام يهجدهـا
كن الظلام بحرب مـع لمعـة النـور=وكن الزلازل حاضـره مـن رعدهـا
والحين انا ياصاحبي جيـت مسـرور=والأزمـه أدري مالقـت مـن وئدهـا
واللي فقدني لة خفوقـي تقـل سـور=واصب لـه تريـاق صافـي شهدهـا
لوالأراضـي جـدب وحقولهـا بـور=ماضاقت صدور العـرب مـن جلدهـا
ثالث سنة والضرس بالراس مكسـور=والسوس غاشـي والعيـون برمدهـا
في مجتمـع ديـن التكافـل وبحـدور=كـم أُسـرةٍ طاحـت قوايـم عمدهـا
اللي ضحية قرض يخصـم ومجبـور=واللـي يـدوّر فـود والخافـي أدهـا
تكاتفت أيـدي مـن الشـر مضمـور=علـى نـواة الإقتـصـاد وسنـدهـا
غابه وشعـب المعركـه دب أو ثـور=ومحاولـة تكذيـب للـي رصـدهـا
يُعكس حديث (الشارت) لو كان محكور=حتى تصيـد المصيـده مـن قصدهـا
حتى الخبر لو هـو مُحفّـز ومنظـور=خلّوه سلبـي وأرجفـوا فـي بلدهـا
ماهي إعادة هيكلـة سـوق مغمـور=هذا هو إرهاب البشـر فـي رغدهـا
ممارسة إرهاب فـي وضـع مستـور=من هـو يصـدق أُم تنهـش ولدهـا
لوكان جيل التضحيه عضو مبتـور=لو نخسر الأرواح ثابـت وتدهـا
والضغـط عـدا كـل تحليـل دكتـور=والقـاع متهايـل وهـايـل نكـدهـا
لكـن بفضـل الله والعلـم مخـبـور=قـدرت أحـدد هالنـقـاط بعـددهـا
رغم إرتدادات الوهم قلـت مخطـور=نـزور قيـعـان وبعـيـدٍ أمـدهـا
حبكتها لك صح من خمسـة شهـور=قلت الخروج أفضـل وهـذا وعدهـا
ما خان علمي وإنت ماعنـك مذخـور=والنفـس تفنـى ماتقصّـر جهـدهـا
وإن قدر الله والهـدف بـات مقـدور=أبشـر بخيـر المقبـلات وبـردهـا