لاعاد يوم(ن)رحت سوق ابن خلدون=لكن خطى(ن) ربي كتبها عليه
شفت الذي ياسعود جدد بي طعون=جدد طعون(ن) في ضميري خفيه
شفت الغضي ياسعود يمشي على الهون=يبرى لها رجل(ن) حظوظه قويه
قدامهم بزر(ن) على خطاه يمشون=لا وهني أبوه لا واهنيه
يشبه لها ياسعود نسخه بكربون=ما كني الا اشوف جال الثنيه
خبري بها قبل اهلها الها يغطون=يوم اننا بزران نلعب سويه
مصيونة(ن) والعرض ياسعود مصيون=ماعمرها داست دروب الخطيه
قلت انحرف قدام هم لي يشوفون=اخاف من هرج(ن) يسبب اسيه
اقفيت ودموعي على الخد يجرون=تقول وبل(ن) هل من عقربيه
طلعت بالشارع لك الله مجنون=مدري انا ياسعود باية نحيه
انا اشهد ان الحب ياسعود ملعون=في كل يوم يزود القلب كيه
كل مابغت تابس جروحه ويبرون=ساقتني الاقدار للمهمهيه
لو للهوا حاكم وقاضي وقانون=ما مات قيس بسبة العامريه
لاكن هذا شي في الحب مسنون=واللي جرى مع قيس يجري عليه
وختامها يالله ياخالق الكون=تجعل حياة الزين دايم زهيه