الليل توه وجزل الشعر من مطلعه = والصدر روض القصيد وبيت سحر البيان
والشعر لو ميز الرجال ما يرفعه= لاصار ماهو بسامي عن دروب الطمان
يا شايل الشعر صوتك بالطرب وزعه = كم لي مع الهم غارق يالله المستعان
دورت عن ضيقة الخاطر مكان وسعه = ولا لقيت الصديق اللي بوصفه حصان
صكات بقعا تجي للواحد مجمعه = والعشر لاعاد تستغرب لاصارت ثمان
منهو يحبك عشان يْدور المنفعه = لازالت المنفعه يزول حبه عشان
كم شدةٍ من سببها طاحت الاقنعه = أثر وجيه الاوادم ما عليها ضمان
لو حصل القلب بأطراف الزمان سنعه = ماشفت لك قلب يشكي من صروف الزمان
ولو كل ذكرى تمر القلب وتودعه = ما كان قلب الهواوي واصلٍ للجنان
مريت لاحلى مكان وخطوتي مسرعه = ياليتنى ما ذكرت اللي حصل بالمكان
يابنت الافكار عشت الوقت في مقطعه = ولو شان وجه الزمان العزم ما يوم شان
لو كان بعد الحبايب طعنةٍ موجعه = حسبي علي البعد والفرقا وفقد الحنان
ياليت كلماتها باللي حصل مقنعه = أمسيت منها بري وأصبحت معها مدان
لاالعرف يقبل تصرفها ولا الاشرعه = سوت بقلبي من أسباب العنا مهرجان
حاولت أعذل الفواد الصب عن مرتعه = ولقيت فيها فوارق عن جميع الحسان
عذروبها الذوق والاحساس ومدلعه = ومع زود حلو الوصايف حلو نطق اللسان
صوتٍ يضيع جميع أذنٍ تبي تسمعه = متكدر الصدر لاسمْعه عن الهم زان
هي منبع الزين وأصل الزين هي منبعه = هي خلطة المسك والجوري مع الزعفران
سبحان منهو وهب هالزين ومصْنعه = ياعنك من شافها فيها يحط الرهان
منهو ملكها لكل البيض طق أصبعه = يصوم عنهن كما صوم العرب برمضان

[table1="width:95%;"]