سلام ياعبدالعزيز ومساء الخير=يسعد صباحك واقبل أزكى التحايا
أسوق لك ذود المدايح مغاتير = تكاثرت برياض جودك رعايا
واسوق لك خيل الكرامه طوابير= استوطنت ميدان مجدك سرايا
واصب لك صفر الدلال المباهير= بالهيل والشكرالمثنى ملايا
للفجر نور وللمراجل بواكير= وللسيف حد وللنجابه مزايا
جدك وابوك ملوك شعب ومشاهير= سادات يعرب باختلاف الروايا
مغوار وآل سعود روس المغاوير= الله رفعهم فوق بين البرايا
أهل السيوف القاطعات البواتير= ترهب هل الغايات سود النوايا
لو صارت الأيام سود مناكير= بايمانهم جل المصايب ضحايا
ماشوفها توفي غرض كلمة أمير= أشوفك أكبر في كبار السجايا
وجه السعد وجه الفرح والتباشير= هداج تيما للكبود الظمايا
أحلم من أحنف في كثير التدابير= والحر ما يحتاج كثر الوصايا
عندك هل الحاجات مثل المسايير= حليت بانصافك عقود وقضايا
عندك عموم الشعب ورد ومصادير= وقتك ومالك للرعيه هدايا
لأهل النوايب ماتجيد المعاذير= تخفي يمينك عن شمالك خفايا
يأتيك من حمله ثقل شامخ النير= سوت همومه في حياته سوايا
يرجع من الفرحه يغرد كما الطير= أما كذا والا بلاش العطايا
طهرت بدموع اليتامى المقاصير= روح النقاء من مهلكات الخطايا
ياسيدي زادك تواضعك تقدير= الناس تدري والمشاعر مرايا
عيبك خذيت الطيب كله عن الغير= أقصيت ماخليت لوهي بقايا
والطيب ثوب تكتسي به مناعير= هندام والرديان عاشوا عرايا
أكتب لك اعجابي بالاشعار تعبير= عما يكنه خافقي بالحنايا
وأقولها بلسان كل الجماهير= الله يجيرك من سهوم المنايا