عساك بخير وبعزة عسى الأشـرار للتنكيـد=فداك أرواحنـا يـادار والعـدوان مدحـورة
سلمتي يارياض الخير ياديرة هـل التوحيـد=كفاك الله فعل اللي نـواك اليـوم بشـرورة
وتسلم ينبع وجده مـن الارهـاب والتهديـد=ويسلم كل شبرٍ في بلاد الشيخ اخـو نـورة
بلادي كل يومٍ يشهد البـاري غلاهـا ايزيـد=حروفك يابلادي في صميم القلـب محفـورة
عشقتك يالسعودية وحبي لـك بـلا تحديـد=على ارضك يابلاد الخير ربي باسـطٍ نـوره
عسى ربي يجيرك من طغاة الفكر والتعقيـد=وترى نفوسٍ نوتك الشر معروفة ومأجـورة
شرتها زمرة الطغيان تبغي بدارنا التصعيـد=بعد ماشافت ان الأمن فيهـا عالـي سـوره
ترى عدواننا كثرت ويصعب فيهـم التحديـد=ويزعجهم تكاتفنا وهـي بالحيـل مقهـورة
غريب الوقت اظهر زمرة تفتي بـلا تعميـد=خوارج والخوارج من قديم الوقت محضـورة
خذت منهاجها من ناس لافـادت ولا بتفيـد=مثل سعد الفقيه اللي ترى الافساد دستـوره
يسير من دعاة الفسق والتنصيـر والتهويـد=سفيه الرأي من سمعه اظنه فاقـد شعـوره
عسى رب العباد يرد كيد الخايـن الرعديـد=الا ياخيبته من صـار هالممقـوت دكتـوره
وقول الزمرةٍ تنهج طريـق الغـدر والتبديـد=بأية حق تقتل طفلـة فـي البيـت مغـدورة
وباية حق تزهق نفس جندي من بني التوحيد=شنيع أفعالكم أشلاه وسـط الـدرب منثـورة
الا ياقاتـلٍ نفسـه اخصـك أنـت بالتحديـد=ترى الاسلام يبرأ منك لـو اتقنـت ديكـوره
ولا ينفعك عند الله فتاوى زيـد ويـا عبيـد=اذا هي خالفـت سنـة نبـيٍ كامـلٍ نـوره