يسج الفكر مع بعض العلوم ويكثر التفكير= وهاذيه يصدرها وهاذيه يوردها
تصدر راويه وتعود ضميا فوق جال البير= اصب الها القراح ان جت وانقدها وافقدها
اسرحها طلوع الشمس ثم تضوي علي عصير= وانا مابين هالوقتين اصارعها واكابدها
يضيق ابي الفضا واقول ياالله ياعساها خـير = تشايلني وانا مابين اقربها واسددها
اصورها بعين العقل واضبط دقة التصوير =اخليها ثلاث ابعاد واجمعها واحددهـا
وعشان اميز التقصير واسلم من عنا التقصير= انوخها واحط الوسم وافرقها بشاهدها
يميل ابه التعب جفن ٍ غفى والفكر حاله غير= يصحيها تسامر ليل والناس بمراقدهـا
الا ياعين لو تبكين اشوف لعبرتك تبرير=فقدتي من يشوقك والعرب تبكي فقايدها
شكيتي مالقيتي عذر لغيابه ولا تفسير =بكيتي ثم بكيتي والدموع ابكت وسايدها
ليا مرتني الذكرى دموعي فالجفون تحير= اكفكفها عشان الخلق ماتفطن وتنقدها
تراودني بعد قلبي لقى من اسرها تحرير= تصور له ليالٍ ماضيه بالحيل فاقدهــا
اعاملها سوات الحلم لاجات بجناح الطير= وتشب النار بضلوعي ولادري كيف ابخمدها
لسان الحال عبر عن كيني واوجز التعبير = وصور له طعون ٍ في صميم الجوف جاحدها