|
هدا هدا
مها هدا هدا هدا مولودة في عيد الضحيه ماكملت مها سنة ودهّا تمشي مهيه مها هدا هدا هدا اتقوم واطيح وتصيح ولاتهدا يابعدّي كم طفلة ودّها تمشي وتكبر وتدرس وتعدّي يابعدّي وآخرتها النقل كن رووس الطالبات ... فـ الصباح وفـ الظهيرة ... في تبيس العاديات ... روس الغنم في حظيرة ... ياكثر ما موتن يابعد راسي من حوادث ماتجي إلا مع الفصل الدراسي هدا هدا يامهيه تكبرين وتدرسين في أي كليّة إلا كلية الطب وبعثه خارجيه وتطلعين الجامعيه يامهيه هدا هدا يامهيه بكرى لامنك كبرتي ودرستي وتعبتي وتخرجتي يمدحون سوبرمان حافز وفيها منّه إن تكلمتي خطيه وان سكتي انقهرتي وان سألتي عن توزيع الموارد بالتساوي رحتي مرواح الموارد رحتي غلطة واللي حاصل ماتغيّر كني أشوفك مثل بنت القصيّر أو مثل الأميرة مضاوي ما أبي أسمع رجاوي .. موضافتش وشطحانوف... كل شمر شطحة وحده ... وهاذي تشطح بالألوف يامها هدا هدا يا المهي يامهاوي أنتي ماغيرك أحب كل حبن قبل حبي لك كذب يامها هدا هدا أنتي بنتي يابعدّي وبكرى لامني كبرت وطحت أنتي ارحم لي من أمك وولدّي وشيء طبيعي كل شيء من غيرك انتي دون داعي وخلال حافز لا وصلتي سن الياس أو سن الأمل الوظيفة دون بند ودون عقد ابلا أمل وبعد حافز شيء طبيعي الطريق إلى الضمان الأجتماعي شيء طبيعي انطباعي عن بلادي وشيء عادي اعتقادي دون اعتمادي شيء طبيعي .. او انطباعي او ...____ .. او حرامي او ____.... .. او عصامي او تبيني .. او تباني او عديني .. او او او عوّي قلبي عوّي ذيب(ن) عوا(او) يعوي ولا حوله ذيابن أتعّوي. وبعد بكرى لاتقاعدتي وشبتي مثل شيبي وبعد وبعد بكرى أنا يمديني رحلت ورحت ذكرى إن ذكرتيني تنهدتي وقلتي ياحبيبي كيف عيني تغيب عن عيني تذكريني وتبكيني وكل دمعه من اعيانك فوق قبري تسقي عروقي وينبت عشب شوقي الخلود يامها هدا هدا كل فتاة ٍ بأبيها معجبه إلى مالا حدود عندها أنه شيخ لو هي بنت راعي ... جنه لو هو نار حمرا .... شهم لو هو مقطع أربع ... عطر شيح ... هاب ريح .. وعندها أنه ... ... .... عاقل وصدره وسيع . وهو نطه صديع .. وعندها انه شجيع لو هو فيها لك عليه يقبع الهوشه وفالنحشه سريع وعندها انه وعندها انه وعندها انه كلمته تمشي على كل الجميع ومع تواضعها الوضيع أكثر العالم تضيع إلى مالا حدود وهو ماله وجود كل فتاة ٍ بأبيها معجبه وأصدق الشعر اعذبه وأعذب الشعر أكتبه يامها لامن ذكرتيني تراني .. ياكثر ما أخطيت وأشقاني زماني.. آبن أدم نادم وماكثر ذنوبي ... في حياتي بس عذري مودماني .. ما أنخلقت إلا عشان إني اضحيّ ولا حد(ن) ضحى على الدنيا عشاني ... ماني لاش ولاني ماش ولاني هيت .. ولابخيل ولاحسود ولا اناني ... لكن الأيام والجهل ورفيقي ... اللي كنت احسبه واحد من أخواني... فـ الرخا قدام لكن في الشدايد ... للتفت ادوره ماهو وزاني ... كن من هو راح حفله دون دعوه... وأحد(ن) قال العزا محدن دعاني ... ماجهلت الا علي اللي يجهلوني ... ولاتجاهلت الدخيل اللي نخاني ... والله ان اللي دخل في سد وجهي ... لو أنا المجني عليه وهو جاني ... وأول أحبابي وتاليهم حبيبه .... ابتليت ابحبها مدري بلاني .... التقينا وليتها ماعلمتني ... أنها تزوجت غيري كياني .... أنسان ثاني.. زوجوها واحدن عنده دراهم ... دنجوانيه خذاها دنجواني ... ياعساني في جهنم كان أفكر .... في حليلت واحدن غيري عساني .... يامها وأسمك على اللي زوجوهــا ... الدراهم مادروو العمر فاني ... الغلا من غير ألف مني إليها ... بعد ماكان الغلا بين المحاني ...... اللي في قلبي من الدنيا ومنها ... والله أنه يامها على لساني ... واحمد الله يوم جيتيني نسيت ... ظلم ظالمني ونسيت اللي نساني .. كان عمري ليل من يوم انخلقتي .. ما أذكر ان الليل من شمسك غشاني .. الثواني كانت أيام الثواني .. وانخلقتي وصارت ايامي ثواني ... أمنيه أنا أتمناها من الله ... لو أنا من اجلها أخسر آماني.... أسعدك ثم أسعدك ثم أسعدك ... لو أنا عشت وعمر ربي عطاني ... يامها هدا هدا كيف أغني لك هدا وأنتي أجمل غنوة في العالم ومن كل الأغاني |
| الساعة الآن 10:52PM |
Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية