ياليل ياعيني وياعين ياليـــل=يامن تسمّع ونّتي (وِنّ) معهـــــــــا
إشتقت في ليــلي لذيك التـعاليل=وايام فى الديره سرى الفكرمعها
طرى علي مجلس زحول الرياجيل=ولعـلومهم نفــسي تزايــد ولــعهـــا
وفنـجان برّيه زهى فوقه الهيــل=من دلّة الرســـلان الاوّل صنعهــــا
يصبّها شبلٍ خواله حلاحيـــــل=وهو مشى مع ساقهم ما قطعهــــا
في مجلسٍ ما شجّع القال والقيل=ماضمّ قايلها ولا من بدعهــــــــــا
وتفتحت بيبان صدرٍ مقافيــــل=واللي قــلع هم البشر ماقلعهــــــا
طرواعلي ربعٍٍتقافوارحاحيل=وامست منازلهم سراب ٍ بقعهـــــا
كم رجل منهم كان راهي كما النيل=هذي شبر فيها وهذي ذرعهـــــــا
تنصاه لاكثرت عليك النشــابيـــل=ويرفعك مهما كان في مرتفعهــا
ماهو مبدّل رفقة العز تبديــــــل=ولاهو بكاسر هقوتك عن سنعهــا
واليوم ابيت اقول ياعين ياليل=من يوم شفت الناس سيطر جشعها
لكن نفسك لاتشكّى الغرابيــل=اصبرولاغيرك يحــــــــــــسّ بوجعها
وابحث عن القبله ليا ناصف الليل=ياحظ من لله يدينه رفعهـــــــــــــا
قادر يسهّل صعب الاحداث تسهيل=ويذهب عن النفس الشقيّه فزعها
وصلاة ربّي عد وبـــلٍ همــاليل=وعداد خطّـــاطٍ حروفه طبعهـــــــا
على النبي ونبجّـل القول تبجيل=صادق أمين افضل شريعه شرعها