عزالله انه ضايقاً بالي اليوم = من ضيقتي كني بسجن انفرادي
كن الفضا من ضيقة البال مزحوم = اضيق من المحشر بيوم التنادي
النوم قضّيته كوابيس وحلوم = عجزت احقق راحتي من سهادي
لا ساهراً سهراً بعيداً عن النوم = و لا نايماً نوماً لذيذاً وهادي
الجو ضج وعج وغيوم وهموم = صارت على ماقيل داب الجرادي
عجزت اميّز خيل الاصحاب والقوم = كل يهددنا نهار الطرادي
امسيت من بعض الرجاجيل مليوم = واصبحت ابرهن موقفي بأجتهادي
وانا بشر ماني من الذنب معصوم = ولا ني مكلّف في ذنوب العبادي
يوم الوفا عند الرديين مزعوم = ناديت لاكن من يجيب المنادي
واليوم طيري بالفضا يدرج الحوم = الله ولا وجهاً غشاه السوادي
اتعب واعين النفس بالصبر واقوم = وامشي على البيدا طليق الايادي
واصارع الدنيا بضربات وسهوم = يمكن تصيب ويصبح الضرب قادي
جمر الغضا دسته بالاقدام مقسوم = واقول للشمات ثلج وبرادي
كم يدّعي مثل السعيدين محروم = لوهو بوادي والسعاده بوادي
من شأن مايلقابه النذل مثلوم = اللي يدوّر للنقايص عمادي
لو للردي وسماً على الوجه ماسوم = وسماً على الجبهه للاعيان بادي
ماينخدع به بالملمات مكلوم = اللي حداه من الصواديف حادي
رضا الله اول فيه الانسان ملزوم = ورضا البشر وزعولهم شيء عادي