ماراح من عمر الأوادم في الزمن لا مايعود=والآدمي ماراح من عمره لزومٍ يذكره

لكل شيٍ في الحياة احوال وابعاد وحدود=واللي يقابل شي ما يصلح بقلبه يقبره

يا صاحبي ما انته على اللي ما يليق أبك محدود=وان شفت ماعفته بحنكة فاهم الوقت اعبره

ومن لا عرف طبع الجلاده أو عرف مبدأ الصمود؟=أقل شيٍ في حياته يمكن انه يكسره

نيّيتك مركز قوتك .. وأفعال يمناك الجنود=وياعزتي للشارب اللي صاحبه ماعبّره

وأن كان ترجي مدّة الوقت الردي مافيه فود=مهما تلقّيه النحر تبغاه لقّاك ظهره

عوّد يمينك ياعميل الخير بأفعالك تجود=ولا تحايد عن طريق الخير لو قيد شعره

ولا تخاوي لك ارجالٍ ما يبلّون الكبود=لاخير في ارجالٍ تمشّيهم بكلمتها مره

ولا تعنّز لك على رجلٍ ليا ثارت شرود=بعض الأوادم لا حمى الميقاف شف له غبره

وخلك من اللي في المصاعب ما يبيحون السدود=وأبذل من اموالك مادام ان الأمور ميسّره

وأقصر لسانك عن كلامٍ ما تقيّده القيود=ولاتبدّي هرجةٍ للناس مافيها ثمره

واحفظ حقوق الجار دامه عهد من ضمن العهود=جارك إذا بانت بواين عورته لا تسيره

والضيف لامنه لفاك افزع وبرّك له قعود=للضيف واجب قاله الرحمن ما احدٍ ينكره

وان كان شفت الخايب اللي في سواليفه هبود=طع شور اخوك اللي يغثّك لا تحاكيه أحقره

واحمد إلهك من حمد مولاه في رزقه يزود=ربك كريم ولا وهبك الخير واجب تشكره

ولا تشغل اوقاتك بكثر اللهو والعالم رقود=واستر ترى من يستر المسلم إلهه يستره

واصبر ترى صبرك لطاعة خالق الكون محمود=والذنب لامنك فعلت الذنب لا تستصغره

وان كان تبغى المنزل العالي وجنّات الخلود=شيطان نفسك لا تفرعن لازم انك تدحره

واقول لك .. تدري .. وش اعظم شي في هذا الوجود؟=مخافة الخالق وقدر الدين لو تستشعره