|
(( قصاصات من ... أرق __ عالمي الخاص )) ..
أخواني واخواتي الكرام
هنا نزف قلم وخلجات روح ... هنا اجد نفسي وتجدني هي ..... هنا زوايا من نفسي ومني ..... ستجدوني هنا بين الفينة والأخرى فلا تحرموني من تواجدكم .... .................................... أنني هنا أجد نفسي بين أوراقي العتيقة وحروفي العقيمة وكلماتي التي الهبتها أنفاسي الثائرة فهذا هو عالمي المجهول الذي تتلذذ به نفحات الدهور المهاجرة فهنا مستقري وملاذي وزمجرة قصائدي وخشوع أحاسيسي
اشتاق لك شوق الغرير اللي فقد حضن الحنون=وشوق المفارق عن دياره يوم حانت رجعته وشوق الصحاري للحياه وهل ودّان المزون=والجفن لا طاول سهر ذيك الليال لهجعته وشوق السجين لطلعته من بين جدران السجون=ساقه هواه لما مضاله والحمام بسجعته تحاياي وكل تقديري |
تدور بنا رحى الدنيا ولا ندري عن المكتوب=ولا ندري وش اللي تخفي الدينا لأمانينا نسير بها ولا ندري من الحاضر وش المطلوب=ولو ندري عن اللي جاي ماسارت خطاوينا وانا حولي أحاسيس ومشاعر يابشر وقلوب=ولكن ما لقى قلبي ضفاف ولا لقى مينا |
لا يُعبث بخلجات القلم
ولا يستكان بين حفر التعالي والجهل فالثقافة لا تحتضن الفلسفة والعقول لا تحتمل الهوامش والبلبلة اعلم ان من وصلوا العلا لم يخرجوا من بين الآلف والياء |
يابنت قهويني ترى خاطري عمس=جودي بفنجالٍ يطيّر عماسه ترى الخفوق من الزمن منحمس حمس=وراسي خواه من الزمن واحتواسه بطمس هموم الوقت من خاطري طمس=زيدي لي المسمار وارهي قياسه |
تعالي جعل مالك عن حبيبك يالغلا مجناب=تعالي يابعد من نامت عيوني على طيفه تعالي ريّحي قلبٍ على شوفة عيونك ذاب=يبيك ولا مشت دنياه وظروفه على كيفه |
......
لم يكن غير حلم وانتهى 00 لم يكن غيرشيء من الوهم في عتمات الدجى مخطيء حين شاهدت مقلتاك ترسم كذبة الزمن عدت لا شيء بين يديك سوى دفتر أو رؤى محجبة مرعبة عدتفي موكب الهموم تسجيني حروف الغمام المتعبة في فصول الأسىء التائهة .... |
صدوق يارش السحاب المراديم=اللي على العارض بداله رشايش يالله عساك تعم كل الأقاليم=وتسقي وطن منهي زهتها الغوايش شيهانةٍ بين الحرار الصواريم=من عقبها وضلوع قلبي هشايش أمشي مع العالم على الوجه واهيم=عايش ولا كني مع الناس عايش |
سوالبف الغرام وحكمة العاقل وطبع الطيش=على رفقة رفيقٍ ما يصون برفقته خوّه على وقتٍ من أيامه كريمه ماهناله عيش=ولا يهنأ مع أيامه سوى من فيهم جروّه وناسٍ ماتعيش الا على التفتيش والتشويش=آوادم مابها للصاحب اللي وافي مروّه |
الوقت له حكمة ونقمة ومنظور=لو كان تجريبه تصاريف الأقدار ساعاته ايامه واسابيعه شهور=وطبعه على كل المخاليق دوّار دايم رحاه تدور وسنينه تدور=ومن لا عرف مبداه في يوم ينهار كنه على قلوب المواليف مسعور=فعله على قلبٍ سطى فيه جبّار لو شفت فيه من الأمل بسمة النور=أحذر ترى للي وثق فيه غدّار عش فيه كأنك ضيف والحال مستور=وخلّك على باقي بلاويه صبّار |
أيا حزن الصبا ... أيا جراح دامية ... أيا نظرات دامعة
أرفقي بي كفا ماحل من تمرد الضياع القاسي في شتاء الوقت من طفولتي حتى زهرة شبابي ... فقد استوطن الحزن في عمق أعماقي واستشهدت جروحي في ذاتي |
عجزت اعرف من الزمن وين مرساي=قامت بي ايامه تموج وتصافق ماجاز له فعلي وطبعي ومبداي=يجوز له من غش غيره ونافق وقضيت عمري بين بايع وشرّاي=لكن مباديهم معي ماتوافق |
سياسة ( اللف ) هذي ماتناسبني=لو فيه ناسٍ على ناسٍ تقاس بها نفسي على الطيب والعليا تهذبني=وتختار في اللي بها الدنيا يناسبها ولو فيه ناسٍ على طبعي تعذربني؟=الناس في رأيها ما احدٍ يحاسبها |
...
انبشي مشاعرك المتراكمة .. وأثيرعواطفك المتبلورة ... وانتشلي كل جنون الحب في أعماقك .. واصرخي في هجيرالزمن .. وبقوة عواصف الألم .. وضخي ماتراكم من حب في حنايا جسدك المتلطخ بخيانة البشر .. وقولي .. ( أحبك حبا ماتلذذته بنات حواء ) ... ... |
ياللي على قلبي تسوق طعونك=يامتلفٍ روحي ويامشقيها إلى متى وانا أحتفي بطعونك؟=ومن دم قلبي يالغرام اسقيها ؟ ماقلت لك ان الزمان يخونك؟=وفرحتك ياخذها ولا يعطيها؟ هونك على قلب المعنى هونك=لاتنقلب دنياك ياباغيها ومن بعتهم والله ما يشرونك=وتحطك الدنيا تحت رجليها أفهم كلامي لك فديت عيونك=وأعرف ترى الدنيا بلاها فيها |
ياطير ياللي في سماء نجد وضواحيها تحوم=لا وآآهنيك شالك جناحك على كف الغمام تكفى طلبتك كل مامريت مع ذيك الحزوم=بلغ سلامي له وعجّل لي بمردود السلام ماردتك عن شوفته ذيك المبادي والسلوم=واللي سواتي يا أبرق الجنحان ما ظني يلام |
المرأة ...
إن رجح عقلها كانت كالدرة الثمينة ... وإن رجح جمالها .. كانت كالياسمينه ... وإن رجح دينها كانت كالضياء الذي يضيء الدنيا .. وإن خسرت كل هذه الأشياء فكأنما اسود الكون بأسره .. |
|
حبيبي ضايقٍ صدري ولا أدري وش سبب ضيقه=دخيل الله علمني وش اللي صار بغيابي دخيلك لاتطوّلها على اللي ناشفٍ ريقه=ترى والله يا كل الغلا ضاقت بي ثيابي |
مياسةٍ في غجها لوعة قلبي=فديتها من علو الراس لأقدامي |
وين المكان اللي عن الحب مسؤل=في أجسامنا ودي يحدد مكانه عندي قضيه معه يبغالها حلول=وعليه حق الله وعهده وامانه الأوله : وشلون يذعن على طول=من دون يرجع لي بحكم الأمانه ويحط قلبي ملك بيدين مجمول=ويحط روحي عند غيري رهانه ؟ ويصول في ذاتي على الكيف ويجول=ويعطيه كلي دون عهد وضمانه وتصبح حياتي كلها فصول وفصول=واعاف نومي طول ليلي عشانه ويصير قلبي فيه مغرم ومشغول=وتفجّر عروقه روافد حنانه والثانية : حالي غدى منه مسلول=ماعاد عندي عن همومه حصانه أما يجيني حقّي اليوم مدبول=وتثبت بحقه من فعول إدانه والا تصير السالفة ضد مجهول=واصير أنا والقلب عنده رهانه |
عسى الله يفرج ضيقة النفس ياسلطان=ماعاد احتمل من دنيتي كثر ماجاني تحمّلت من جور الزمن والعذاب الوان=بعد فعل من فعله جرحني وعناني يقولون من يصبر قدر والكريم معان=وانا أقول مافاد الصبر والعمر فاني وأنا والله أني ماهقيت الرجل ينهان=من الوقت لين انه على الصالي اركاني |
لاتكثّر في كلامك خل ما باقلب خلّه=واستمع ياراعي الهرج المصفف في كلامي أبك انا من خلقت الدنيا ما اجي في درب زلّه=ولا تراعد في مقابل من يواجهني عظامي الوكاد أني طلبتك لاتزيد الطين بلّه=خل قلبي يحتفظ لك لو بشي من احترامي |
صدقت لكن كذّب الشوق وعدك=وذابت بقايا شمعةٍ بين الأضلاع ياغيم مالجلج صدى صوت رعدك=والبيد عطشا والرجاء فيك لو ضاع؟ يبقى الأمل في مقبل الغيم بعدك=لو كان حظ البيد ياغيم ماطاع |
ماعاد ابي من دنيتي شي يابنت=أخذت منها ما كفاني وصديت في وجه صلفات العواكيس مالنت=حققت كل اللي بعمري تمنيت ولا اذكر اني في قفى صاحبي شنت=واخذت هرجة ذاك ولذااااك وديت قدري حفظته وين يابنت ماكنت=لأني على بعض البشر ماتماديت ما اهين في قولي ولا عمري انهنت=وان شفت ماعفته على طول قفّيت لآني على مبداي يابنت وايقنت=أن الحسيب اللي بنى واكرم البيت |
ان كان قصدك مابقالي من سنين=روحي تراني عشت عمري لحالي ماعشت في الجنه وخضر البساتين=وخسرت في الدنيا من اغلى حلالي وان كان قصدك يوم جيتي بتبكين=ابكي على حالك وروفي بحالي |
ابعد عن الزلات وابعد عن الحيف=ولراعي النمّات ما ارخي سموعي واشوم عن بعض الحكي والسواليف=لو كنت من بعض السوالف جزوعي وانا احمد الله ماعليّه تكاليف=الكل خابرني وعارف طبوعي وان كان ماعدّيت روس المشاريف؟=مانيب ذخر اللي يضد الجموعي |
وين أنت ياللي عليك البال مشغلني=القلب يسأل وانا تحرجني اسئلته بعدك عن عيوني الثنتين يقتلني=والصدر باقي كلامٍ فيه ماقلته ما أقول أنك قضيت شهور مهلمني=ولا اقول قلبي بصدق شعور عاملته ولا أقول قلبك بعطف الحب شاملني=ولا اقول دمعي على فرقاك سبّلته أقول عجل عليك الجوف مشغلني=يسأل وانا يالغلا تذبحني اسئلته |
| الساعة الآن 01:27PM |
Powered by vBulletin® Copyright ©2000 - 2025, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية