الكاتب سعود
شكرا لك على صراحتك المهم بناء على طلبك ساسرد لكم يوم من عمري
كنت ابن التاسعه من عمري وكان بجوارنا جيران ليس لديهم اولاد بل بنات ثمان بنات فيه اثنتين منهن
متزوجات والباقي بالمنزل واصغرهن بالعاشره ولكن كنت لا احبها كنت احب ام السابعة عشر الوسطى
بالبنات حيث انها تقربني لنفسها بحنانها لي و استانس وانا عندهم وكان ابوهم وامهم حنونين وطيبين جدا
ان كانو احياء الله يزيدهم صحه وان كانوا اموات الله يغفر لهم وكانوا يفرحون بوجودي بين بناتهم
ويحرصون على اكرامي واحيانا انام عندهم ويجون اخوتي ويطلبون ان يصحوني وكان ابوهم
يرفض ان يصحيني ويقول الولد ولدنا خلوه وباكر يجيكم واذا اصبحنا وافطرنا خبز وفول رحت لاهلي
وشوي وانا راجع لهم حتى ا والدتي رحمها الله صارت ترسل معي اكل يكفي عشره وتوصيني حطه وارجع
واذا حطيته وجيت ارجع تحلف علي مريم ان ما اروح وكانت الابنه الوسطى اسمها مريم ونناديها بريوم
فقالت لي حط بالك الليله تنام عندنا قلت ليه قالت ابوي وامي يبي يسافرون يومين ويرجعون وسوف
يطلبونك من اهلك تبات معنا يعني تصير رجال البيت فرحت لانني احبهم الا الشيطانيه سويره المهم وافقوا
اهلي على الطلب وطول الليل سواليف وحجاوي ونمنا الا ريوم مسويه نايمه وهي ما نامت وجت وقومتني
وقالت انا مستاحشه قم جسرني وقمت فرحان ان معي احد يسولف قالت قوه للمقهات سعود يعرفها يعني
المجلس ورحنا وصارت تسألني متى تبي تعرس ومنهي اللي انت مختار وكم تبي تعطيها مهر وش تبي
تسوي ليلة العرس قلت لها انا صغير اخواني قبلي قالت طيب اذا كبرت قلت لها
اتوظف واجمع قروش واعطيهم لها قالت طيب منهي ردية الحظ قلت انتي وهي تخمني وتقول يابعد قلبي
انت والله لو اعلم انك تبيني صدق لانتظرك لين تكبر ولكن ابا اعلمك عن الزواج علشان تفهم وعلمتني عنه
الله يذكر ذيك الايام بالخير وشكرا لك اخ سعود لفتح هذه الصفحه وشكرا لمن سبقوني بذكرياتهم

السلام عليكم ورحمة الله


تلبية لطلب اخوي الكاتب والاديب سعود اعود واقدم لكم اخواني واخواتي هذا اليوم من عمري لعله ينال رضاكم
مما اعتبره يوم بعمري من ضمن الايام الكثيرة اللتي لا تنسى كنت بزيارة لقريتي بمعية والدي رحم الله وسكنا عندعمتي رحمها الله وكان الملك سعود بن عبدالعزيز رحمه الله معزوم فيها من قبل الاماره والاهالي وكان فيه حفل اي عرضه وغداء وحلويات في ذلك الوقت اي منذو اكثر من خمس وخمسين سنة يعني الحفله لملك وبعد الانتها من الاكل جو شباب القريه كلا جايب له ماعون اي قدر او طاسه او صحن وكانوا ياخذون فقط الحلوى المهم رجعت لعمتي ووجدت ان جيرانها مرسلين لها من الحلوى حيث ان اولادهم ثلاثه واكبر مني بكثير وجايبين كميه كبيرة قالت لي عمتي وراك ما رجعت واخذت لك قدر وجبت لنا مثل العيال قلت انا ما شفت الاكل ولا الحلوى من اصله انا عند اللي يعرضون ويقولون قصايد اتفرج عليهم وهم يضربون الطبول المهم قالت الا قل انك صغير وتوك واما عيال جيرنا وانا عمتك كبار ويعرفون مصالحهم وحزت كلمت عمتي صغير في نفسي وبكره صفونا بمسجد العيد وصاروا يعطونا قروش وجا اللي يوزع وعطاني عشره ريال عربي فضة ومديت يدي الثانيه من خلف اللي جنبي وكان اللي حنبي صغير وعطاني اللي يوزع عشرين واخذتهن وش ثقلهن حطيتهن بطاقيتي وبسرعه هربت لاحد ياخذهن مني ورحت لعمتي وعلمتها باللي صار وبعد ساعه جت ام الجيران تقول عسى ولد اخوك اخذ قروش من اللي يقسمون عليهم و ابشرك عيالي عطوهم كل واحد عشره وعمتي تعتدل مبسوطه قالت وش تقولين يعني عيالك ما عطوهم الا ثلاثين ريال قالت ايه فيها بركه وابوهم عطوه عشرين قالت ولد اخوي عطوه ثلاثين ريال يعني اكثر من ابوه وهي تشهق ام الجيران قالت وش تقولين عطوه ثلاثين وهو امس ما عرف يجيب حلوى مثل عيالي والله ما انا بمصدقه قالت عمتي لها صدقي وقصت عليها حيلتي وبعده وانا طريح الفراش مصخن بيومها المهم نادوها للقهوه وحطوا لها تمر واكيد اخذت عمتي الفصم وغسلته وعطتنيه بسرية تامه وتشافيت ولله الحمد ورجعت للرياض وانا سعيد ولم انسى هذا اليوم والكل صار يقولي يالذيب عندما دروا كيف اني احتلت ومديت يدي من خلف اللي بجانبي رغم صغر سني وقتها واعدكم اخواني واخواتي اني حتما ساعود اليكم بيوم من عمري جديد واستودعكم الله ودمتم بخير




وللجميع تحياتي

الغالي سعود
يارب انه يسعدك ويوفقك بجميع اوقاتك اينما اتجهت واينما حليت بكل خير
تسلم لي على هذه الصور الاثريه وصدق من قال الشي بالشي يذكر رحم الله الملك سعود
وزوجته اللتي ارضعتك ونعم الام ونعم الاب وما باقي الا وجه الله هم السابقون ونحن اللاحقون
اخي الغالي نحن بالانتظار لسالفتك مع اللحم وسنكون من المتابعين لما يجد ويستجد هنا ودمت



تقبل تحياتي