السلام عليكم ورحمة
اخواني واخواتي الكرام
اضع اربع قصائد لكم كمصافحه ثانيه
و أرجو أن تحوزعلى رضاكم

(قصيدة ياهيه)

ياهيه ياللي تذمون الشعر فيني= اقروا لشعري وبعده هاتوا اقراري
ياناس شعري من الافكارلافيني= ماهو تصنع ولا لعب(ن) بالاوتاري
الشعر بلسم على جرحي و شافيني= وما عاد باقي بعمري كثر ما صاري
وباللحن وزني وللمعنى موازيني = من مصنع(ن) مايضم لهزل الاشعاري
اكتب بحرفي عن الوعاظ كافيني= ما احتاج واعظ بفكره غير افكاري
الوعي نافع وربي فيه مغنيني= واشكر لربي بعقلي ما بعد طاري
املك لنفسي ولو ضاعت ملاييني= وما كل جاهل يعرف الوقت دواري
ان عاش راسي ورب العز محييني = لاكتب وصايا تفيد صغار وكباري
ياسعود عجل بحكمك يانظر عيني= وناد اريش العين تكتب حكمها اسطاري
هي ملهمه بالنقد والحق تكويني= وانته مخضرم فهيم بزين الامهاري

(قصيدة عشت)
عشت وتناما بالصغر لي سؤالي =واليوم اشوف اجابته بالسليقه
يومين مرت لي وانا مع خيالي = من ثالث ايامي خيالي حقيقه
ممشاي مع فكري وجنبه امالي= وما عفت من فكر(ن) اجنب طريقه
انصح لنفسي مع جميع الاهالي= نسلك طريق(ن) فاهمينن مضيقه
ونطلع بالاخلاق الحميده علالي= وكل(ن) يبين بالمجالس عقيقه
ما سرنا بالسوق نشريه غالي=واللي تبيه النفس ما احد(ن) يعيقه
مابين ربعك والاهل والغوالي = خلك بالاول مع صفوف(ن) سبيقه
قل ماتبي له بالمدارك شمالي= والتبر معروف(ن) ولومن بريقه
حققت مقسومي بالاول وتالي= والناس تشهد ما احرقتني حريقه
قلته وانا قانع وربي عطا لي= عقل(ن) يميز بالمدارك عميقه

صبرت صبر(ن) فاق صبر(ن) لايوب= والصبر مل وقال دور بديلي
قلت اه ياصبر العنا ويش مطلوب= قال العتق لا حد(ن) بدالك هزيلي
قلت السبب والسيف بيديك مقضوب= اعرف عيوبي واعتقك بتحليلي
قال العيوب الخافيه مابك عيوب= ما شفت ظاهر والسراير حصيلي
الخصم يبلاك و يرطب على الثوب= وضعك محصن بالفعل ياعميلي
قلت ابشر بعتقك والا ناب منهوب= افهم بنفسي والصعب ينحنيلي
خذ صك عتقك ماتناسب لمهيوب = مانته على قدر المصاعب زميلي
وتلقى لغيري ما يفيدك ومعيوب= يشكيك من غيضه على كل جيلي

(امري لربي)
امري لربي وامر ربي علي دين =ورد الوفا ربح(ن) على من يرده
اخاطب اللي يفهم الزين والشين= والا مريض العقل ياقف وحده
وش فهمه باللي يدير الموازين= ما كل ثوب(ن) فوق جسم(ن) بقده
ما كل من ساروا عليها نصيحين= كم واحد(ن) فيهم رقع فوق خده
وما كل من قالو فهمنا فهيمين = الفهم مقرون(ن) بفهم(ن) لضده
يا واعيين العقل حثوا على الزين= ومن يفعل المعروف يلقى مرده
يا معانقين النجم من وين الى وين = وقت الرخاء مقلوب للناس شده
لدو على ناس(ن) ضعاف ومساكين = اتعبهم الفقر وخشانة مخده
ما ضاع طيب (ن)عند ناس(ن) لبيبين= والا ردي الفعل ماحد(ن) يوده

تحياتي للجميع