أبا أترجَّل لو مناخ .. الفكر جاف=وأبا افتح أوراقي وأعطر سطوري
بالمفردات الطاهر .. حق وانصاف=وأقول يابكرات الافكار دوري
‏طوفي بصدري طوفه الحاج ياطاف=تباركي بي واسجدي في شعوري
سجود شكر وخلي الحبر شفاف=عشان يزهى في عيوني حضوري
انا السما لو مالها حس وطراف=وانا الفضا لو المجال محصوري
وانا الخيال اللي تفرد بالأوصاف=يامنكرين النور والنور نوري
شدو ركايبكم على الطرق والقاف=شدو عليه ولا يجيبه قصوري
أسروه مسرى ليل بسراج عراف=يضوي على رجم(ن) شمال مهجوري
والليل به له فجوة ما تبي لحاف=الينتصف كني عليها محشوري
فجوه لها نشوة ونكهة ومشراف=يا أرقبت به قامت تلاحم كسوري
يشرف على وقت(ن) به المور والهاف=دور(ن) مضى قلبي عليه معصوري
به البشر ما دلبحت لآم الأرداف=ولا برزت به ردف بنت(ن) جسوري
راكد محيطه مانكسر فيه مجداف=ولا رد به شيخ(ن)ولا شاخ نوري
فزعه وطيب ونخوة نفوس(ن) خفاف=ماهم ثقال نفوس والفكر ثوري
متكاتفين(ن) ... لو تباعدن الأكتاف=متعاطفين(ن) ... غرسهم ما يبوري
أحرار نسل أحرار ومعاشر أشراف=الجار عند الجار دمه يفوري
ماهو مثل هالوقت طاريه ينعاف=رفع مقام مقدسين التجوري
قام يتفاخر به سلوقي وبلاف=يامر وينها به صعيدي وسوري
وعن لا أزيد الطين بله وينشاف=أبي امنع التصوير لو كان فوري
وأبا أترك الملعب وابا العب بالأطراف=واشره على نفسي لو الدور دوري
واعطي عناوين السهر داخلي طاف=أريح جفوني ... وأداري شعوري
وابقى بداخل جوي الممحل الجاف=لو كان من حقي اعطر سطوري