تصاميم المصمم مابعد شفنا لها قيمه = حصات(ن) جبتها يمي ولا ادري وين وازنها

أثرك تبيت النيه وترجي بالصحو غيمه =تراقص لك شياطين(ن) سكنت بوسط مسكنها

تصاميم المصمم جابت اللي شفت تقديمه=وزانت وانت لين الحين بعلومك تشينها

عسى ربي يبارك فيك رييّس منتدى ريمه=علامك ماتحب الشجره اللي غصنكم منها

شهور الحول محسوبه بتاريخه وتقويمه= عليه تاتمشيها وترجع تاتزينها


مدام انته رغبت البيت خذلك فيه تعتيمه= وانا من دون طلح الدوح كانك ناشد(ن) عنها

انا عقمت جرح(ن) قبل ماحصلت تعقيمه=وبيّنت العلوم اللي قليل العرف راكنها

يثور المخزن اللي نرفز الطاغي محازيمه=وانا مامشي تحت حكمة سرائيل وتسلطنها

حليلك واحليلك مجتهد واجروحك أسقيمه = تبى الدكتور يفزعلك وبالعصار يدهنها
يثوربك اللغم لوهو بجيش الصرب تلغيمه= وبنيت لدولت(ن) عظمى لحالك صرت تقطنها

انا من فضل رب البيت راعي قدر(ن) وشيمه=ولا الد النظر فاللي سواليفه يكربنها

إلي فنجال دله وانت إلك براد تلقيمه=وانا اشوف المنيحه زانت وكثرو زباينها

ضميرك عقب دمرته ياليت تعيد ترميمه= وترد حقوق جيران(ن) لها حولين راهنها

ليا عدت قرايا المملكه عدوك ياثليمه =على وجه الخريطه بس أشوفك طايح(ن) منها