السلام عليكم ورحمه الله وبركاته :
اليوم الموقف مختلف كلياً <<<< يكتب بيد وحده طلعت من البيت متجه لمحل الغاز اببدل الاسطوانه المهم وقفت عند المحل جاء العامل وشال الاسطوانه فووووق كانه يشيل اثقال ، طبعاً الاسطوانه فاضيه المهم ويتمشى قدامي وهو يشييل الاسطوانات لزباين ثانين بيده الثنتين ورافعها فوووق ونزل الاسطوانه وجاب اسطوانه مليانه ونفس الحكايه وشايلها فوق كانه حامل اثقال وحطها بالسياره وحاسبته ومشيت وانا في الطريق افكر فيه ماشاء الله عليه شايل هالاسطوانه وصلت البيت قلت في نفسي والله هالهندي مو باحسن مني بشي وانا ارفع الاسطوانه فوق وادخل فيها بالبيت الا خلاص مافيني حيل وطاحت الاسطوانه غصبن عني وعلى يدي والحمد لله سويت اشعه وربك ستر طلع شعر باليد بس |
هلا وغلا بمهندسنا غالب المطيري الله يسعدك ضحكت وزعلت في نفس الوقت ضحكت يومك تبي تصير مثل واحد متمرن على الشيل هذي مهنته وكل صاحب مهنه يتفوق فيها وزعلت على طيحتها على يدك وما تشوف شر والحمدلله على قضاءه ونحمد اللي ما جعلها اكبر مشكور ولاهنت تقبل تحياتي |
:) الحمد لله على السلامه ياغالب وتهون ان شاء الله . ماتشوف شر ياغالي . |
السلام عليكم ورحمة الله البارح حصل فصل سويته بالشايب الله يتوب علي فيه رفيق لنا من اهل حايل وعزمني انا والشايب قال الشايب انا اسموحوا لي قال صاحبنا والله لين ما جيت انه زعلي ورضاي قال الشايب الا زعلك اجل ابا امر على الشايب واجيبه معي قلت لا رح من عندك اقرب لك تدل المكان قال مالك لوا قلت اللي تشوفه اجل اجني مبكر اوريك قصصك بالمنتدى كلها مكتوبه يعني دخلت تاريخ الانترنيت من اوسع ابوابه والمغرب وهو عندي وجلست اوريه القصص ويشوف التعليقات قال عسى ربع المنتدى ماهب عارفين اسمي قلت له افا ما يعرفون الا الشايب صديقي الصدوق قال تكفى لا تعرفني على احد منهم المقالب فشيله قلت ولا فشيله ولا شي كلها مزوح تجي وتروح حتى ولو تراني ماني محللك ان رمى الفال بهم واجتمعنا قلت الا شافوك عرفوك انك شايبي قال اذا جوا جمع معي خمسة شياب ولا يدرون منه فينا راعي القصص قلت ابشر المهم قال ابا تسنن قلت الله يقبل منك وقام والا عندي كروت وعلى ظهر الكرت بلاستك تشيله وتلصقه واكتب على الكرت اسمه كامل وكلمة يقولون لي ابو فلان و الصقها على شماغه من خلف حطيتها براحتي بيدي على ظهره ولصقتهابالشماغ وهو لا يعلم كان وقتها يصلي الله لا يعاقبني وسلم وقالي وش تبي يوم تطقني مع ظهري وانا ساجد قلت خفت انه جاك شي طولت بالسجده وخفت عليك بس اشوا حسيت بنسمك وهان الامر قال لا تعودها وانا اصلي فجعتني بغيت اوقولك وش تبي بس اشواذكرت اني اصلي وتمالكت نفسي قبل اقولها قلت حتى يا ابو فلان لو قلتها ما عليك حرج وانت ما قصدت انك تتكلم مثل اللي يشرب وهو صايم ناسي انه صايم المهم رحنا للي عازمنا وانا اعرف الشباب كلهم المعزومين شباب مرحين وطيبين للغايه سلموا وما انتبهوا للكرت وقلت ابو فلان صل فينا صلاة العشاء قال لا فيه الشباب متعلمين يصلي واحد منهم قالوا لا انت صل فينا انت الخير والبركه تصوروا وش صار ويوم تقدم فيناوكبر وهم يشوفون الكتابه وما تمالكوا انفسهم وينسحبون من من الصلاة للخارج وهم متقطعين من الضحك كملنا صلاتنا ان ناسي الموضوع واقول وشفيهم قطعواالصلاة المهم سلم والا معزبنا يوم حط غترته بافمه ويضحك قال انتم وش فيكم تضحكون واين الشباب انا مكبر وهم صافين وراي قلت ذكروا انهم اكلين لحمةابعير وراحوا يتوضون ويقوم يتسنن واجيه من الخلف واطلع الورقه من شماغه واخفيها والله خفت يزعل علي ولكن قال ويش يخفى يا رسول الله قال اللي ما حصل الشباب قالوا له ليش انت معلق ورقه بشماغك والله ضحكنا ونحشنا اول مره نشوف واحد يكتب اسمه على شماغه ويصغي علي قال الشباب هم لمي قلت لا لمي انا قال اشوى وانا اغمز لهم ويصغي علي واحد منهم قال هو مخرف قلت ايه لا يوحيك هم يظهر السوط عليك وهو يلتفت لربعه الشباب قال اسكتوا عنه ترى لكم عليه ما هو صاحي لا تبلشونا معه ويستر الله وقتها انه ما عرف ويش يقولون بس عرف من بكره قال والله لو اني احبك انك معاد تشوفني قلت ما هو انااللي حطيت الورقه قال اجل حاطه روحها قلت لو الله الا ابليس الله يعيذنامنه لعب علي قل اها بس لا عاد يلعب عليك عديتها لك هالمره بلحالنا سواللي تبي بس تخلي ها الورعان يضحكون جعله اتلا بعد ولهم وجيه يسالوني بس معذورين بلاهم ما يعرفون ثقلك وثقل مزحك واحب على راسه قلت له سامحني قال اخر مره قلت ان الله قاله قال سامحتك بس متى تبي نروح لجده قلت مدامك سامحتني ان بغيت هالحين قال لا خلها بعد اسبوع نشري للعيال مقاضي رمضان ويكون خير وسلامتكم تقبلوا تحياتي |
ههههههههههههههه الحمدلله على سلامتك ياغالب
الهنود معهم جنون هههههههههه من بيقلدهم العم سفيرالمعاني ههههههههههههههههههههههههههه ماشاءالله على روحك المرحه صراحه مواقفك تموت ضحك شلون على الطبيعه مالومهم الي ضحكوالشايب الضحيه ياليت يسجل معنا انتم الخيروالبركه الله يطول اعماركم هههههههههههههههههههه ربي يسعدكم جميعا وبنتظارالمزيدبشوق وفقكم الله |
ههههههههههههههههههههههههههههههههه
اتخيل منظر الورقه الاصقه عليه من ورى :) ومطباتك مهي مطبات عرب:) وياحلاة شايبكم يابو محمد . والله اني ضحكت من قلب .. ربي يسعدك . |
هلا وغلا بشموخ نجد
ليته يعرف للكمبيوتر عيا يتعلم يقول من اشوفك وانت دايم مطنبس وانا عايفه ما ابي اعرف بس اذا طلعت له اليوتيب يشاهد ويضحك على بعض المقالب اللي في اليوتيب مشكوره على الحضور تقبلي تحياتي |
هلا وغلا با ابو خالد اكيد انك تحب المطبات انا اموت فيها وافرح ان احد يسوي لي مطب لاني اسوي له عشرين مطب الواحد اقوى من مطبه لي عشر مرات اصير معي حق لاني ماسك البادي اظلم تسلم لمحبك على حضورك وتعليقك والف شكر لك تقبل تحياتي |
الحمدالله على سلامتك
|
اقتباس:
الغالي اسير الليل الله يسلمك من كل شر شكرا لك على المرور تقبل تحياتي |
الساعة الآن 11:51PM |
Powered by vBulletin® Copyright ©2000 - 2024, Jelsoft Enterprises Ltd.
HêĽм √ 3.1 BY: ! ωαнαм ! © 2010
جميع الحقوق محفوظة لشبكة رهب الأدبية