قصيدة جديدة وطلباتكم ياغالين في رقبتي لكم دين

[عبدالرحمن الدوسري]

استلموا لاهنتوا
اقــــــــــــــــــــــول

بديت بالله طالبه للظما ري= من مزون مرزمات(ن)للصحاري

والجر هديخضر من بعد لاشي=ويطيب ليل الشعر مع كل ساري

وشاكي عذاب الحب يلقى به الفي=وراعي الحلال بطيب فاله يماري

متبارك(ن)رزق الفتى ولو هو شوي=ويحق له يفخر اليا حل طاري

يابو سعـــــــد ناصيك دامك بعد حي=لي طلبة(ن)عندك ولاهي اجباري

تدري مشبب تطريه بعض الطواري=ذاخرك للشدات بالحال داري

يفداك ولد اللاش دايم ورى الغي= ولا انت في الطولات سيل(ن) وجاري


وسلامتكم ومن قراها ابي رده وراها

[للي تستاهله]

اخوي مشبب مع اعجبني انك نزلت هذي الابيات بعد الابيات اللي راحت بسرعة بس لازم ارد عليك
احس الابيات الاربع الاولى غير مرتبطة مع الابيات الباقية او يمكن ما فهمت الابيات صح
يا ليت بس لو تشرحها لي و ما عليك امر
بالتوفيق لك مشبب
تحياتي

[عبدالرحمن الدوسري]

ابشررررررررررررررر ولا يهمك طال عمرك غالي والطلب رخيص
الحقيقة القصيدة هذي مسندها على رجال كفو وشورواك
وابيه يدخل في موضوع زواج وما ادراك ماالزواج خلها على ربك ههههه
المهم بداية البيت يقول
بديت بالله طالبه للظما ري= من مزون مرزمات (ن)للصحاري

معناه هنا شبهت حالتي بالصحراء القاحلة التي اصابها القحط وفيه اطلب الله يجيب المطر والمقصد هو الحبيبه هذا في الشطر الاول
اما الشطر الثاني فصورت المزون وهي الغيوم التي ينزل منها المطر المتانثر بقوة على الارضوليتها تجي مثل المطر تكفى ياولد
اما اليت الثاني
والجر هدي(ن)ويخضر من بعد لاشي=ويطيب ليل الشعر مع كل ساري
فهنا صورت نفس الحالة بالجر الهدي والجر الهدي هنا معنها مكان السيل في البر اذاانت بدوي اكيد بتعرفه واكمل البيت الاوب بالثاني بوصف مقدرة الله يبحانه وتعالى على ان قادر بان يجعله يخضر من بعد لاشي وان الشاعر يتهيض عندما يرى هذه المشاهد الجميلة خصوصا لو كان عاشق
عرفت وشلون اخوي الغالي؟
المهم
البيت الثالث يقول
وشاكي عذاب الحب يلقى به الفي =وراعي الحلال بطيب فاله يماري
الشطر الاول اقصدبه خويي اني انا متعذب من الحب وانت الوسيط اللي تعرف اهل البنت
والشطر الثاني افهمه اني ماابي منه مال وانب معي مال واقدر ادبر نفسي بس انت خلص الموضوع
والبيت الرابع يكمل الثالث طال عمرك ونفس المعنى لكن بقول اقوى

متبارك(ن)رزق الفتى لو هو شوي=يحق له يفخر اليا حل طاري
اقصد فيه ان مالي باذن الله اقدر اقدمه مهر وان ماحصل فانا اقدر ارخص المال لو جا له واجب او طلبه مني احد عرفت وشلون؟
ويحق لي افخر بافعالي او يفخر بها غيري من جماعتي
والبيت الخامس يفتح موضوع جديد اللي هو اني انخاهخ لايخليني ولازم يفزع لي
واقول فيه
ياابوسعد ناصيك دامك بعد حي= لي طلبة(ن) عندك ولا هي اجباري
هنا اوضح له اني متوكل عليه بعد توكلي على الله سبحانه وتعالى واني اطلبه ولا اجبره
اما الابيات الباقية كلها مدح فيه وهو مثلك وشورواك يستاهل المدح
اوقول
تدري مشبب تطريه بعض الطواري= ذاخرك للشدات بالحال داري
هنا امدهح واوضح له انه للشدات والصعاب ذاخره واوضح له انه هو عارف اللي اقصده والبيت الاخير مدح ايضا من غير طلب
واقول
يفداك ولد اللاش دايم ورى الغي ولاانت بالطولات سيل(ن)وجاري

اعتقد البيت هذا واضح مايبي اكثر من كذا تفسير وان بغيت افسره فقل لي وانا حاضر
ولك شاكر
ومنك نستفيد

[عبدالرحمن الدوسري]

وينك اخوي (للي تستاهله)ابي ردودك على ردي لك(^.^)
:thumb:

[ღ..ღ نيفين ღ..ღ]

تدري مشبب تطريه بعض الطواري
ذاخرك للشدات بالحال داري

يفداك ولد اللاش دايم ورى الغي
ولا انت في الطولات سيل(ن) وجاري

::

اخي الشاعر
((( مشبب الدوسري )))

اولا اشكرك علي هالمجهود الرائع
وتفضلك بالشرح
دام الله لنا هذا الطيب والعطاء الجزل

ثم اشكرك علي الابيات الشامخة
التى تعكس نخوة واصالة ليست مستغربة بطرحك

سلمت يمينك وعزت يسارك
ودمت سالما سعيدا .. .. نيفين

[عبدالرحمن الدوسري]

اخي الشاعر
((( مشبب الدوسري )))

اولا اشكرك علي هالمجهود الرائع
وتفضلك بالشرح
دام الله لنا هذا الطيب والعطاء الجزل

ثم اشكرك علي الابيات الشامخة
التى تعكس نخوة واصالة ليست مستغربة بطرحك

سلمت يمينك وعزت يسارك
ودمت سالما سعيدا .. .. نيفين

مااكبر فرحتي بقولك هالكلام مرورك لقصيدتي واعجابك بها فعلاً يعني لي نجاح كبير وحنا نفعل الطيب لأهل الطيب طال عمرك ومشكوووووووووووووووووورة على مرورك:e:

[احلاكم واتحداكم]

فعلا انت من اهل الطيب يامشبب

صح لسانك والله يعطيك اللي في بالك

[عبدالرحمن الدوسري]

ماعليك زود بااحلانا



ومشكوره ع المرور


مشبب الدوسري

[غالب الذيابي]

مشبب يعطيك الف عافية..


ان كان انك رجال تبيها مجاملة


تأكد انا بنقول صح لسانك واللي فالقلوب


علمه عند الله.


وان كان انك رجال تقول


ابي رايكم



انا شخصياً من وجهة نظر متواضعة


اقول لك اعد النظر فيها مرة.. ومرة


وان كنت انا غلطان اتقبل ارءكم..


سلامي وأحترامي

[عبدالرحمن الدوسري]

اخوي غالب
لالالالالا مانت بغلطان ولكن وجهة نظرك احترمها وانت كمنا قلت اللي في القلوب علمه عند الله


كل واحد يقول اللي بخاطره


والقافلة تسير طال عمرك

اخوك مشبب الدوسري

[عبدالرحمن الدوسري]

اخوي غالب وينك؟

[عبدالكريم الضبيب]

اولاً .. يعطيك العافيه
على هالأبيات السبعه


ثانياً .. أسمحلي بالتعقيب :


1/ بديت بالله طالبه للظما ري= من مزون مرزمات(ن)للصحاري

الشطر الثاني أول ماقرأته قلت كسر لكن اللي
أتضحلي أنه ثقيل اللفظ ..



2/ والجرهد يخضر من بعد لاشي=ويطيب ليل الشعر مع كل ساري

والجرهد يخضّر من بعد لاشي .. أيضاً أعدت قرائتها
كذا مره واتضحلي أيضاً راكاكه في الوزن بـدخول ( من بعد لاشي ) واللحن يوضح الخلل .


3/ وشاكي عذاب الحب يلقى به الفي=وراعي الحلال بطيب فاله يماري

بيت رائع وتصويره أروع ..


4/ متبارك(ن)رزق الفتى ولو هو شوي=ويحق له يفخر اليا حل طاري

انشهد .. البيت هذا لايحتاجله ألا الأشاده
في المعنى والصياغه .. وهو اجمل بيت في الأبيات.


5/ يابو سعـــــــد ناصيك دامك بعد حي=لي طلبة(ن)عندك ولاهي اجباري

البيت هذا لاتخلوه شائبه .. مباشر ..


6/ تدري مشبب تطريه بعض الطواري=ذاخرك للشدات بالحال داري

الشطر الأول هنا أصبحت القافيه موحده .. بمعنى
البيت ينتهي شطره الأول بطواري والشطر الثاني بـ داري .. وهذا خطأ كبير .
وفيه كسر واضح بدخول تطريه
ولو أن الشطر هذا تم أيضاً تلحينه لااتضح الخلل .


7/ يفداك ولد اللاش دايم ورى الغي= ولا انت في الطولات سيل(ن) وجاري

في الشطر الثاني هنا خطأ أملائي بنقص حرف الألف
(ولا انت) .. المفروض تكتب ( والا انت ) لكي يوزن
دخول الشطر الثاني .


الأخ مشبب الدوسري
7 أبيات عليها ملاحظات وزنيه واضحه
نتمنى منك وانت حسب ماأقرأ بأنك شاعر قدير
أن تعدل على الأبيات .. بأسرع وقت
لأنها تسيء لك كـ شاعر
وأنا مؤيد لكلام الأخ / غالب
فلنبتعد عن المجامله ..
دمت بخير .

ساس

[عبدالرحمن الدوسري]

اخوي ساس اولا اشكر لك مرورك ثانيا

انا ابيك تقرى الشرح اللي بعد القصيدة

ثالثا/ لحن القصيدة وتاكدانها بتركب على اي لحن

رابعا/وانا ماانزل شي الا بعد مااعرضه على رياجيل كبار في السن وكبار في الشعر




شاكر لك اخوي


اخوك مشبب الدوسري

[عبدالرحمن الدوسري]

الغالي ساس

على فكرة ربما يون هناك بيت واحد يكفي عن الف قصيدة

وخير الكلام ماقل ودل

وانا مقللها عشان اوضح لابوسعد مطلبي وباختصار




اخوك مشبب الدوسري

[عبدالله بن عريمة]

صح لساانك يامشبب

وقصيدة تحمل معااني جميلة

ومالي فيها ملاحظة الا كما قال الاخ ساس
6/ تدري مشبب تطريه بعض الطواري=ذاخرك للشدات بالحال داري
هنا اختلفت القافيه عن سابقاتها

والله لايهينك والى الامام

[عبدالرحمن الدوسري]

الى الامام الى الامام


ابن عريمه شرفني مرورك طال عمرك


وردك يتوجني



وابشر انشاااااااااا الله طال عمرك انت تامر على الروح

[عبدالكريم الضبيب]

اخوي ساس اولا اشكر لك مرورك

العفو ياغالي


ثانيا
انا ابيك تقرى الشرح اللي بعد القصيدة

قريته الله يسلمك .. الشرح يختلف عن ماقلته لك من ملاحظات
أنا لاأختلف معك في المعنى بل أختلف معك في الوزن وتكرار القافيه


ثالثا/ لحن القصيدة وتاكدانها بتركب على اي لحن

لا واللي خلقك .. ماتركب على أي لحن

رابعا/وانا ماانزل شي الا بعد مااعرضه على رياجيل كبار في السن وكبار في الشعر

ونعم فيهم ممكن جاملوك الله يحفظك
لكن لأجل القراء ..
أنا لاأعرفك ولاتعرفني .. انا هنا انتقد القصيده ..






على فكرة ربما يون هناك بيت واحد يكفي عن الف قصيدة

وخير الكلام ماقل ودل

وانا مقللها عشان اوضح لابوسعد مطلبي وباختصار

أكيد فيه بيت أعجبني وانا وضحتلك أنه من اجمل الأبيات
وخير الكلام ماقل ودل .. كلامك على العين والراس
لكن أخوي مشبب .. والله أني أتمنى منك تكتب بنفس مستوى
الأبيات اللي في توقيعك ..
وأنا بأنتظار جديدك

تحياتي لك

[عبدالرحمن الدوسري]

الله لايهينك وشاكر مرورك واشكر ايضا تعليقك

والله يوفقنا وياك لعرض ماينال استحسانكم وانتظر الجديد باذن الله ومشكور طال عمرك

[حنان]

صح لسانك

ابيات قوية وعذبه

وتقبل مروري
وننتظر جديدك

[عبدالرحمن الدوسري]

الاخت حنان اشكرك طال عمرك على مرورك وردك

والجديد قريب باذن الله

اخوك مشبب الدوسري