غربة فكر

[كريم العفيدلي]

أصبحت أحس إني غريب ببلادي
غربة فكر ياصاحبي كم أليمة!

لو أنها مابين الأغراب عادي
بس غربتك مابين ربعك جريمة

لو الطموح يطاولنه الأيادي
ماشفتني أرقب مع كل غيمة

نوق المشاعر ضامية و احتدادي
خوف المصير ب (هل) تبقى عقيمة

هالركب يمضي في زمانٍ رمادي
وأنا جهلت ألوان فيني مقيمة

حاولت تفسير الوجع و انقيادي
يعلق بحلقي مثل طعم الهزيمة

ليا متى ب أبقى على ما يكادي
يلفظ أنفاس المنطلق و العزيمة

مليت من حظي وتجهم مرادي
ومليت من وقتٍ كأني غريمه

عشت الشتات وماوصلّه مدادي
وبالمحبرة صبيت دمعة جحيمه

مافادني حلمي وصهوة جوادي
ولا فادني بيض النوايا السليمة

ظل داخلي طفل الأماني ينادي
يقتات بوح الذكريات القديمة

ياصاحبي جرحٍ يضمه فوادي
أعيا فلاسفة العصور الحكيمة

غربة فكر ماهي ترى شي عادي
والمشكلة في مجتمعنا ظليمة!